Раççей Федерацийĕн халăха ĕçпе тивĕçтересси çинчен калакан саккунĕ пур. Унăн пиллĕкмĕш статйинче халăха ĕçпе тивĕçтерессинчи патшалăх политикине палăртнă. Урăхла каласан, ĕç шыракан граждансене ĕçе вырнаçтарас енĕпе патшалăх тĕрлĕ меро- приятисем ирттерет. Ĕç шыракансен шутне çакăн пек категорири граждансене кĕртнĕ: инвалидсем, тĕрмерен таврăннисем, 14-18 çулсенчи çул çитмен ачасем, пенси çулĕсене çывхарса пыракан(пенсие тухма 2 çул юлнă) граждансем, урăх çĕртен ирĕксĕррĕн куçса килнисем, çар службинчен таврăннисем тата вĕсен çемйисем, пĕччен пурăнакан тата нумай ачаллă ашшĕ-амăшĕ (çул çитмен ачасене пăхса ỹстереççĕ), ача-инвалидсем, Чернобыль аварийĕнче пулнисем, 18-20 çулхи çамрăксем. Кăçал районти ĕçпе тивĕçтерекен центрта ĕç шыракан 1152 çынна шута илнĕ. Вăл шутран 22-шĕ пенси çулне çитсе пырать, 13-шĕ- 18 çула çитичченхи ачасем, 50-шĕ нумай ачаллă тата пĕччен пурăнакан ашшĕ-амăшĕ, 25-шĕ инвалид, 2-шĕ тĕрмерен ирĕке тухнă, 14-шĕ çар службинчен таврăннă. Çавсене ĕçе вырнаçтарас тесе ĕçпе тивĕçтерекен центр районти çарĕç комиссариачĕпе 2 договор тунă. Унпа килĕшỹллĕн ĕç шыракан 14 çынна ĕçе вырнаçтарнă. Тепĕр договорне районти 31-мĕш пушар чаçĕпе тунă, 8 çынна ĕçе вырнаçтарнă. Çак договорсемпе ĕçсĕррисем пĕрер уйăх ĕçленĕ. Вĕсене ĕçпе тивĕçтерекен центр 1200-шер тенкĕ парса пулăшнă. Кăçалхи сентябрĕн 1-мĕшĕ тĕлне 16 çынна ĕçе вырнаçтарнă. Шкул пĕтернĕ 18-20 çулхи икĕ çамрăка Комсомольски ял администрацийĕпе килĕшỹ туса ĕçе вырнаçтарнă. Икĕ уйăх ĕçлесе вĕсене 1200-шер(уйăхсерен) тенкĕ тỹленĕ.

Первоисточник: "Каçал Ен"