Спорт çынна çынпа туслаштарать, хутшăнусене çирĕпрех тăвать. Акă, Шупашкарта тата районта пурăнакан пирĕн ентешсем тăтăшах тĕрлĕрен тĕлпулусем йĕркелеççĕ, пĕр-пĕринпе вăй виçеççĕ. Иртнĕ шăматкун, сентябрĕн 3-мĕшĕнче, район центрĕнчи стадионта футбол вăййи иртрĕ. "Кĕтнепе" "Кубня"(ентешлĕх тата район командисем) тĕл пулчĕç. Спортсменсен тупăшăвне курма, вĕсене хавхалантарма район администрацйĕн пуçлăхĕ Геннадий Волков, ЧР Президент Администрацийĕн ертỹçи- культура министрĕ Петр Краснов, Шупашкар хулин тĕп архитекторĕ Сергей Лукиянов, районти хуçалăхсен ертỹçисем, куракансем йышлăн тухнă. Тĕп хуламăртан килнĕ хăнасене районти çамрăк футболистсем, 1992-1993 çулхи арçын ачасем саламларĕç, чечек çыххисем парнелерĕç. Хăнасем те парăмра юлмарĕç, вĕсем панă футбол мечĕкĕ пулас чемпионсене тренировкăсем ирттерме чухах пулĕ. Матч пуçланнă чухне йĕпхỹ пĕрĕхкелетчĕ пулин те, ку футболистсене те, куракансене те хăратаймарĕ. Пирвайхи таймрах вăйă хĕрỹллĕ пуçланчĕ. Пĕрремĕш гола "Кĕтне" футболисчĕсем тапса кĕртрĕç. Иккĕмĕш таймра комсомольскисем те йăл илчĕç, Николай Волков мечĕке шупашкарсен хапхине меллĕн кăна ăсатрĕ. Кун хыççăн икĕ енĕ те пĕр-пĕрне вăйлă тапăнса вылясан та вăйă 1:1 шутпах вĕçленчĕ. Ентешлĕх председателĕ Валери Туркай Комсомольскинчи "Преображение Господня" чиркĕвĕн настоятелĕнчен Алексий аттерен çĕнтерме пил илни те пулăшаймарĕ курăнать. Кубок вара стадион хуçисенчех юлчĕ.

Первоисточник: "Каçал Ен"