Çак кунсенче районти вĕрентỹ управленине Раççей Федерацийĕн Вĕрентỹпе наука минстерствинчен приказ килнĕ. Ăна министр августăн 16-мĕшĕнче алă пуснă. Приказĕ вара района чăннипех те савăнăçлă хыпар илсе килнĕ. Унта Чăваш Республикинчи вĕрентỹ учрежденийĕсен ĕçченĕсене наградăсемпе чысласси çинчен каланă. Вĕрентỹ ĕçне лайăхлатса пырассинче тỹрĕ кăмăлпа тата нумай çул вăй хунăшăн чылай учителе "Раççей Федерацийĕн вĕрентỹ ĕçĕн хисеплĕ работникĕ" кăкăр çине çакмалли паллăпа наградăланă. Пирĕн районтан: Федор Васильевич Гаврилов- Комсомольски 2-мĕш вăтам шкулĕн рисовани, черчени, технологи учителĕ. Ĕç стажĕ- 19 çул, категорийĕ- чи пысăкки. Юрий Моисеевич Копташкин- Асанкасси вăтам шкулĕн ОБЖ преподаватель-организаторĕ. 28 çул ĕçлет. Чи пысăк категориллĕ учитель. Галина Митрофановна Павлова- Çĕнĕ Мăрат вăтам шкулĕн вырăс чĕлхипе литературин учителĕ. Вĕрентỹ ĕçĕнче 21 çул тăрăшать. Пĕрремĕш категориллĕ учитель. Нежметдин Садртдинович Сахров- Урмаел вăтам шкулĕн ОБЖ преподаватель-организаторĕ. Ĕç стажĕ- 26 çул, категорийĕ- пĕрремĕш. Унсăр пуçне пирĕн районти вĕрентỹ системин виçĕ ĕçченĕ Раççей Федерацийĕн Вĕрентỹпе наука министерствин Хисеп грамотине тивĕçнĕ. Вĕсем: Раиса Васильевна Белкова- Комсомольски 1-мĕш вăтам шкулĕн кĕçĕн классен учительници. Вĕрентỹ ĕçĕнче- 30 çул. Пĕрремĕш категориллĕ учитель. Минзейнеб Гаязетдиновна Гибатдинова- районти вĕрентỹ управленийĕн тĕп бухгалтерĕн заместителĕ. Вĕрентỹ системинчи ĕç стажĕ 29 çул. Фидаил Гадельянович Рахимзянов- Урмаел вăтам шкулĕн физкультура учителĕ. 19 çул ачасене физкультурăпа спорта явăçтарассишĕн вăй хурать. Пĕрремĕш категориллĕ учитель. Раççей наградисене тивĕçнисене ăшшăн саламлатпăр, ĕçре кулленхи ăнăçу, çĕнĕрен те çĕнĕ çитĕнỹсем сунатпăр. .

Первоисточник: "Каçал Ен"