ЧР Президенчĕн Н.В.Федоровăн "2005 çулта Республика кунне ирттересси çинчен" Указĕпе килĕшỹллĕн ЧР Ял хуçалăх министерстви сентябрĕн 9-мĕшĕнче Шупашкар районĕнчи ăратлă выльăх ĕрчетекен акционерсен "Чувашское" уçă обществинче Республика кунне халалланă Чăваш Енри ăратлă выльăхсен куравне йĕркелесе ирттерчĕ. Унта республикăри ăратлă выльăх ĕрчетекен заводсемпе предприятисем, ял хуçалăх кооперативĕсемпе фермер хуçалăхĕсем хутшăнчĕç. Выставкăна Муркаш, Етĕрне, Шупашкар, Вăрнар, Патăрьел, Çĕрпỹ, Вăрмар тата пирĕн районти ял хуçалăх кооперативĕсем ытларах выльăх-чĕрлĕх илсе килнĕ. Ĕне-вăкăр, лаша-сурăх, сыснасем, хур-кăркка, путене-кăвакал, кроликсем, пыл хурчĕсемпе пулăсем... Мĕн кăна çук асăннă куравра! Ятарлă стендсем çинче кашни ăратăн тухăçлăхĕпе, хуçалăх çитĕнĕвĕсемпе паллаштаракан кĕске справка та пур. Республикăри ăратлă выльăхсен выставкине ЧР Министрсен Кабинечĕн Председателĕн çумĕ, ЧР ял хуçалăх министрĕ М.В.Игнатьев, Шупашкар район администраци пуçлăхĕ А.П.Князев, ăратлă выльăх ĕрчетекен акционерсен "Чувашское" уçă обществин тĕп директорĕ И.Е.Козин, Мари Эл Республикинчи "Генезис" ассоциаци президенчĕ В.Н.Апарин, вăлах выставка ĕçне хаклакан жюри председателĕ, Тутарстан Республикинчи "Элита" предприятин тĕп директорĕ В.Г.Ахметов, Ульяновскри акционерсен "Ульяновская" уçă обществин тĕп директорĕ Ш.Н.Шакров, районсен администрацийĕсен пуçлăхĕсемпе ял хуçалăх управленийĕсен тата ял хуçалăх кооперативĕсен ертỹçисем пулчĕç. Курава уçнă май, ЧР ял хуçалăх министрĕ М.В.Игнатьев Чăваш Енре ăратлă выльăх ĕрчетесси ăнăçлă аталанса пыма пуçланине палăртрĕ. Уйрăмах кайăк-кĕшĕкĕн ăратлă тĕслĕхĕсене ỹстересси аван пурнăçланать. Сысна ĕрчетесси те кирлĕ шайра. Шел те, республикăра юлашки вăхăтра сĕт сăвасси тата ĕне ашĕ туса илесси унчченхи шайран чакнă, анчах ăратлă выльăх тĕслĕхĕсем пурри лару-тăрăва çывăх вăхăтрах йĕркене кĕртме май парĕ. Çакна халь ирттерекен выставка та ĕненмелле çирĕплетет. Çав выставка юлашки вунпилĕк çул хушшинче пулман. "Паллах, ку тĕлĕшпе çине тăрса ĕçлемелле. Республикăра ăратлă выльăх ĕрчетес енĕпе 44 ятарлă хуçалăх ĕçлет. Вĕсене патшалăх май пур таран пулăшма тăрăшать. Кăçал çак ĕç валли бюджетран 28 миллион тенкĕ уйăрнă. 2006 çулта ку кăтарту тата та пысăкрах пулĕ. Çапах та асăннă предприятисен хăйсен тупăшлăрах, хальхи вăхăт ыйтнă пек тăрăшмалла",- тесе палăртрĕ министр. Пирĕн районтан çак выставкăна "Восток" кооператив хутшăнчĕ. Кунта вăл мăйракаллă ăратлă шултра выльăх, тына пăрусене, çамрăк пăрусене тата ăратлă сыснасене выставкăна тăратрĕ. Республикăра нумайранпа иртмен ăратлă выльăх выставкинче Ирина Ершова сысна пăхакан, Люция Хлебниковăпа Раиса Гладкина пăру пăхакансем чăннипех те пултаруллисем пулчĕç. Хуçалăх выставкăна ăратлă 10 сысна тăратнăччĕ. Çак ĕçченсене жюри кĕмĕл медаль парса чысларĕ. Сыснасене çийĕнчех Муркаш районĕнчи "Волга" хуçалăх туянчĕ. Выставкăна хутшăнасси çăмăл ĕç мар, нумай тăрăшрĕç тынасене, пăрусене çавăтса çỹреме вĕрентме. Тăрăшни вара сая каймарĕ. Республикăра иртекен ăратлă выльăх выставкине хутшăнма хатĕрленессинче Елена Степанова тĕп зоотехникăн тата Галина Федорова тĕп ветврачăн ĕçченлĕхĕ, тăрăшулăхĕ, пултарулăхĕ пирки те асăнса хăварса тав тăвасшăн эпĕ..

Первоисточник: "Каçал Ен"