Вырма вĕçленчĕ. Çĕрулми, сахăр кăшманĕн уйĕсенче хĕрỹ ĕç вĕрет. Паянхи куна районти çĕрулмин 1300 гектарне кăларнă. Çак вăхăт тĕлне "Слава", "Искра", "Дружба", "Асаново", "Победа", "Красный Маяк", "Кызыл сабанча", "Дубовка" кооперативсем, Атласкин фермер хуçалăхĕ çĕрулми уйĕсене пушатрĕç. Районти кашни гектарăн вăтам тухăçĕ 230 центнер. "Слава картофелю" агрофирмăра вара кашни гектартан 370-шер центнер пуçтарса илеççĕ. "Слава", "Рассвет" хуçалăхсенче те çĕрулми ăнса пулнă _ гектартан 300_350-шар центнер тухать. "Асаново" кооператив юлашки çулсенче, аталанса, вăй-илсе кайрĕ. Кăçал кунти ĕçченсем сентябрь уйăхĕ пĕтичченех уй-хирти пĕтĕм ĕçсене вĕçлерĕç. Тырри-пулли кĕлетре, хирти улăмне тирпейлесе урана хывнă, пресланă, кĕрхи çĕртме туса пĕтернĕ, кĕрхи тырăсене акнă, çĕрулмине кăларса пĕтернĕ, уй-хирте трактор-машина сасси лăпланнă. Пултаруллă, мал ĕмĕтлĕ руководителе Николай Моисеевича, Асанкасси ялĕн тăрăшуллă та хастар ĕçченĕсене ĕççине пĕтернĕ ятпа ăшшăн саламласа кулленхи ăнăçу, телей сунатăп. Районти хуçалăхсенче кăçал 394 гектар çинче сахăр кăшманĕ çитĕнтернĕ, 180 гектар çинчен ăна пуçтарса илнĕ. Çак культура Минатуллин фермер хуçалăхĕнче 115 гектар йышăнать. Паянхи кун тĕлне ăна пуçтарса илнĕ. Гектар тухăçĕ- 200 центнер ытла. Сахăр кăшманне "Изамбаево" кооператив ĕçченĕсем 5 гектар çинче пăхса ỹстернĕ. Тухăçĕ вара аван- кунта кашни гектартан 300-шер центнер пуçтарса илнĕ. Кĕраки вĕçленмен-ха, хăшпĕр хуçалăхсенче сеялка кăкарнă агрегатсем паян та ĕçлеççĕ. Пурĕ районĕпе 2600 гектар кĕрхи тырăсем акнă. Кĕрхи çĕртме ĕçĕсене 5800 гектар çинче пурнăçланă. Уйрăмах "Труд", "Дружба", "Урожай", "Рассвет" хуçалăхсенче сухаласси лайăх пырать.

Первоисточник: "Каçал Ен"