Район пуçлăхĕн, район депутачĕсен Пухăвĕн депутачĕсен, ял поселенийĕсен пуçлăхĕсен, депутачĕсен суйлавĕн кампанийĕ тепĕр тапхăра куçрĕ, суйлав кустăрми вăйлăрах çаврăнма пуçларĕ. Районти территориллĕ суйлав комиссийĕнче вара хĕрỹ ĕç пырать. Кунта кун сиктерсе тенĕ пек ларусем иртеççĕ. Пур ĕçе те саккунра палăртнă вăхăтра пурнăçламалла, ыйтусене çи-йĕнчех татса памалла. Сентябрĕн 19-мĕшĕнче территориллĕ суйлав комиссин тепĕр ларăвĕ иртрĕ. Унăн кун йĕркинчи пĕрремĕш ыйту суйлав участокĕсен комиссийĕсен пĕрремĕш ларăвĕсем иртнин пĕтĕмлетĕвĕсем çинчен пулчĕ. Вĕсем организациллĕ ыйтусем пăхса тухнă, комиссисен председателĕсене, вĕсен заместителĕсене, секретарĕсене суйланă, хăйсен суйлав тапхăрĕнче тумалли ĕçсен планне çирĕплетнĕ. Комиссисен ларăвĕсенче суйлавпа çыхăннă ытти ыйтусем те пулнă. ТСК решенийĕнче участоксенчи суйлав комиссийĕсем хăйсен ĕçне суйлав саккунĕпе килĕшỹллĕн туса пыма пуçланине палăртрĕ. Территориллĕ комиссин ларăвĕн иккĕмĕш ыйтăвĕ - суйлав бюллетенĕсен (кашни суйлавçă тăватшар бюллетень илет) формине, текстне çирĕплетесси, шутне палăртасси çинчен. Районта 20 пин ытла суйлавçă. Апла пулсан, сахалтан та 100 пин бюллетень çапмалла. Ку ыйтупа та ТСК тивĕçлĕ решени йышăнчĕ. Виççĕмĕш ыйту- кандидатсем суйлавçăсемпе тĕл пулмалли графикĕ çинчен. Тăваттăмĕш ыйтупа ТСК суйлав участокĕ вырнаçнă пỹлĕмсене, çурчĕсен умĕсене, суйламалли пỹлĕмсене тĕрлĕ материалсем, плакатсем, лозунгсем, вывескăсем çакмалли пирки суйлав участокĕсен комиссийĕсене сĕнỹсем парса решени йышăнчĕ. Пиллĕкмĕш ыйтупа ТСК район депутачĕсен Пухăвĕн депутатне суйлама 11-мĕш Эльпуç суйлав округĕпе кандидата тăратнă Галина Михайловна Яковлеван ("Дружба" кооперативăн тĕп экономисчĕ) заявленине пăхса тухрĕ. Галина Михайловна территориллĕ суйлав комиссине баллотировкăран хăтарма ыйтса заявлени панă. ТСК унăн ыйтăвне тивĕçтерсе постановлени кăларчĕ. Халĕ асăннă округпа тата икĕ кандидат юлать. 

Первоисточник: "Каçал Ен"