Вырăнти хăйтытăмлăхăн представителлĕ органĕсен суйлавĕччен эрне çеç юлчĕ. Районти ТИК графикĕпе килĕшỹллĕн, ку эрнере Аслă Çĕрпỹел, Хирти Сĕнтĕр, Тукай, Комсомольски, Хырхĕрри ял администрацийĕсенче тĕлпулусем иртрĕç. Аслă Çĕрпỹелĕнчи культура çуртĕнче пирваях ачасен районти искусство шкулĕн воспитанникĕсемпе преподавателĕсен концерчĕ пулчĕ. Куракансем кашни номерех ăшшăн йышăнчĕç. Суйлавçăсемпе куçа-куçăн тĕл пулăма район пуçлăхне суйланма тăратнă кандидатсем Г.Волковпа И.Пахалов, район Пухăвĕн депутачĕсен кандидачĕсем В.Кашкаров, В.Кольцов, В.Софронова, ял поселенийĕн пуçлăхĕ пулма регистрациленĕ Р.Минетуллов, Г.Ракчеев хутшăнчĕç. Вĕсем кашниех хăйсен программипе, тĕллевĕсемпе паллаштарчĕç. Суйлавçăсем вĕсене хăйсене хумхантаракан ыйтусене пачĕç. Суйлансан пуçлăхсенчен мĕнле ĕçсен тăвассине кĕтнине те систерчĕç. Çулсене лайăхлатмалла, урамсене тирпей-илем кĕртмелле, шкул ачисене вĕри апатсăр хăвармалла мар тата ытти те. Ял çыннисем çавăн пекех кандидатсем тĕлпулăва пурте çỹременнишĕн те ỹпкев сăмахĕ каларĕç.  Тукай ялĕнче те кандидатсемпе тĕл пулу иртрĕ. ТИК секретарĕ Н.А.Белков тĕлпулăва килнĕ кандидатсемпе паллаштарчĕ. Район ертỹçине тăратнă кандидатсем Г.Ф.Волков, И.З. Пахалов хăйсен суйлав программипе паллаштарчĕç. Граждансен ыйтăвĕсем çине хуравларĕç. Район Пухăвĕн депутатне суйланма 15-мĕш Анат Тимĕрчкасси округĕпе (Тури тата Анат Тимĕрчкасси, Тукай ялĕсем) М.Р.Афанасьевпа В.Н.Курицынăна регистрациленĕ. Тукай ял поселенийĕн пуçлăхне 6 кандидат: М.В.Бархонов, А.В. Григорьев, Н.М.Иванов, М.А. Краснова, П.А.Муллин тата А.Г. Попов. Тукай ял поселенийĕн депутачĕсем 3 округпа пулĕç. Граждансем вĕсен умĕнче çак ыйтусене çĕклерĕç: газ кĕртнĕшĕн укçа тавăрса парасси, культура тата вĕренỹ учрежденийĕсенчи улшăнусем, ялсене тирпей-илем кĕртесси, ял бюджечĕ тата ыттисем.