Октябрĕн 7-мĕшĕнче районти культура çуртĕнче вырăнти самоуправленин представителлĕ органĕсене суйланма тăратнă кандидатсемпе тĕлпулу иртрĕ. Ун умĕн вара Шупашкарти "Çеçпĕл" эстрада ушкăнĕн концерчĕ пулчĕ. Унăн репертуарĕ тĕпрен илсен иртнĕ ĕмĕрĕн 70-90-мĕш çулĕсенче анлă сарăлнă юрăсенчен тăчĕ. Çавăнпа сцена ăстисемпе пĕрле залра ларакансем те юрларĕç, чылайăшне çак юрăсем çамрăклăхне аса илтерчĕç. Ансамбльти Маргарита Туринке, Ирина Резниковăпа Ольга Прокопьева, Александр Галин, Сергей Степанов куракансене чăннипех те лайăх кану каçĕ туса пачĕç. "Чĕрĕ" музыка, гитарăсемпе выляни 20 çул каяллахи вăхăта таврăнма май пачĕç. Суйлавçăсемпе йĕркеленĕ тĕлпулăва çак кун район пуçлăхне суйланма тăратнă Г.Волковпа И.Пахалов, ял поселенийĕн пуçлăхне суйланма регистрациленнĕ Н.Хайруллов, М.Илларионова, А.Тихонов, П.Лапшин, П.Сильвестров, В.Кополухин, З.Тимаев, район Пухăвĕн депутачĕн кандидачĕсем хутшăнчĕç. Вĕсем хăйсен суйлав программисемпе паллаштарчĕç, ыйтусене хуравларĕç.

Первоисточник: "Каçал Ен"