Кашни çулах вĕренỹ çулĕ пуçлансан, вĕренекенсем сĕтел çинчи теннисла выляса мала тухассишĕн турнира пуçтарăнаççĕ. Спортăн çак енĕ шкул ачисен районти спартакиади шутне те кĕрет. Кăçал ку ăмăртусем октябрĕн 9-мĕшĕнче иртрĕç. Аслă классенче вĕренекен теннисистсем Комсомольски 1-мĕш вăтам шкулĕн спортзалĕнче тупăшрĕç. Комсомольски вăтам шкулĕсен командисем районти ытти шкулсенчи ачасемшĕн чăннипех те тĕслĕх пулса тăраççĕ. Вĕсене Ф.Гавриловпа Н.Максимов тренерсем сĕтел çинчи теннис спорчĕн вăрттăнлăхĕсене вĕрентеççĕ. Çак кунхи ăмăртусем çав тери çивĕч иртрĕç, кашни команда çĕнтерĕве хăйĕн аллинчен вĕçертесшĕн пулмарĕ. Апла пулин те Комсомольски 2-мĕш вăтам шкулĕн спортсменĕсем А.Боровков, А.Андреев, Г.Гаврилова, К.Лаврушкина аслă классенче вĕренекенсем хушшинчи тытăçура пĕрремĕш приз хуçисем пулса тăчĕç. Çак шкулти 8-9-мĕш классенче вĕренекенсен команди те (А.Антонов, В.Юманкин, Б.Симакова, А.Коновалова) пĕрремĕш вырăна никама та памарĕ. Вăтам шкулсен командисем хушшинчи тытăçура нĕркеçсем иккĕмĕш вырăн çĕнсе илчĕç. Кĕçĕнрех ушкăнри теннисистсем хушшинче те çак шкул командиех иккĕмĕш вырăна тивĕçрĕ. Комсомольски 1-мĕш вăтам шкулĕн туслă команди виççĕмĕш вырăн çĕнсе илчĕ. Александровка шкулне те теннисистсем йышлăн килсе çитрĕç. Кунта вара зал хуçисем пĕрремĕш вырăна хăйсенчен вĕçертмерĕç. Иккĕмĕшпе виççĕмĕш вырăнсене Хырхĕрри тата Йỹç Шăхаль шкулĕсен спортсменĕсем йышăнчĕç. Çĕнтерỹçĕсене грамотăсемпе чысларĕç, турнира хутшăннă çамрăк теннисистсене ăшшăн саламларĕç. 

Первоисточник: "Каçал Ен"