Çапла ятпа октябрĕн 8-мĕшĕнче Çĕнĕ Шупашкарта "Кĕтне" ентешлĕхĕн черетлĕ уявĕ иртрĕ. "Химик" Культура керменне çак хулара тата Шупашкарта пурăнакан, ĕçлекен ентешĕмĕрсем йышлăн пухăнчĕç. Пĕр-пĕринпе курса калаçма, тăван районти çĕнĕ хыпарсене пĕлме питĕ хавас пулчĕç вĕсем. Уй-хир ĕçĕсене вĕçлени те кăсăклантарчĕ хуларисене. Çак кун ирхине 10 сехетре "Химик" Культура керменĕ умĕнче ял хуçалăх продукцийĕсен выставки ĕçлерĕ. Унта районти хуçалăхсем хула çыннисене хăйсем çĕр çинче туса илнĕ пахча çимĕçне сĕнчĕç. "Кĕтне" ентешлĕх спорт вăййисем ирттерессине йăлана кĕртнĕ. Тăванла командăсем е Комсомольскинче, е Шупашкар хулинче час-часах волейболла, футболла выляссипе вăй виçеççĕ. Хальхинче вара ветерансем футбол уйĕнче тĕл пулчĕç. Вăйă питĕ хĕрỹллĕ, интереслĕ иртрĕ. Тупăшура пирĕн районăн туслă спортсменĕсем Шупашкарта пурăнакан ентешĕмĕрсенчен вăйлăрах пулни палăрчĕ. Вăйă комсомольскисем 3:2 шутпа çĕнтернипе вĕçленчĕ. Каçхине 17 сехетре уяв концерчĕ пуçланчĕ. Залра пуçтарăннисене пирваях "Кĕтне" ентешлĕх председателĕ Валери Туркай, район пуçлăхĕ пулма тăратнă кандидат Геннадий Волков, Çĕнĕ Шупашкар хула пуçлăхĕн ĕçĕсене туса пыраканĕ Вениамин Артемьев, "Инвест-Лад" строительство фирмин ертỹçи Валерий Гордеев тĕлпулу ячĕпе саламларĕç. Çĕнĕ Шупашкар хулипе Комсомольски районĕ малашне те килĕштерсе ĕçлессе, туслă хутшăнусем яланлăхах упранса юласса шаннине пĕлтерчĕç. В.Туркай Çĕнĕ Шупашкар хулин мэрне Валерий Андреева "Кĕтне" ентешлĕхĕн хисеплĕ членĕ" ята панине пĕлтерчĕ. Халиччен ку чыса Совет Союзĕн икĕ хут Геройĕ, космонавт-летчикĕ Андриян Николаев, Вăрнар район ентешлĕхĕн ертỹçи Роберт Сорокин тивĕçнĕччĕ. Концерт программине Валери Туркайпа Елена Галкина ертсе пычĕç. Елена- пирĕн ентеш, Йỹç Шăхаль хĕрĕ. Вăл- Чăваш патшалăх оперăпа балет театрĕн солистки, Чăваш Республикин тава тивĕçлĕ артисчĕ. Репертуар шăнăрĕ Комсомольскинчи ачасен искусство шкулĕн воспитанникĕсен, преподавателĕсен юрри-ташшисенчен тата тĕп хуламăрта пурăнакан искусство çыннисен-ентешсен номерĕсенчен тăчĕ. Ачасен пултарулăхне уйрăмах ăшшăн йышăнчĕç куракансем. Наташа Михайловăна, Диана Карповăна, "Островок" ташă ушкăнне çĕншупашкарсем тăвăллăн алă çупса тав турĕç. "Мишар" эстрадăпа фольклор ушкăнĕ, Ольга Буслаева, Татьяна Макарова, Андрей Автономов, Владимир Михайлов, Ильдус Шайдуллин, Елена Маштановăпа Иван Портнов шăрантарнă юрăсем пурин кăмăлне те кайрĕç. Пĕртăван Малинасем, Елена Галкина хăйсен пултарулăхĕпе савăнтарчĕç.