Районти "Çĕр тата çынсем" музейра тăтăшах тĕрлĕ выставкăсем иртеççĕ. Акă, нумаях пулмасть район халăхĕ, хăнасем "Чăваш наци тумĕ авалтан паянхи кунччен" куравпа паллашма пултарчĕç. Кунта чăваш халăхĕн тумĕ сĕм авалтан хальхи вăхăтчен мĕнле аталанса, улшăнса пынине курма май пулчĕ. Юпа уйăхĕн 12-мĕшĕнче музейра çĕнĕ курав уçăлчĕ. Унта Канаш районĕнче пурăнакан И.Дмитриев, Ю.Родзянов, Т.Кашкаров, Н.Антонова, И.Александров, Г.Захаров художниксен ĕçĕсене тăратнă. Авторсем ытларах пейзажсем, натюрмортсем ỹкереççĕ. Çавăн пекех кунта портретсем тата ытти жанрсемпе ỹкернĕ ĕçсем те пур. Кашни ĕçĕ хăйĕн патне туртать, вĕсем хушшинче хăвна илемлĕх тĕнчине лекнĕ пекех туйăнать. Ỹкерчĕксем чăннипех те куçа илĕртеççĕ, вĕсенче художниксен ăста алли сисĕнет. Кăмăла кайнă кирек хăш картинине те выставкăранах сутăн илме пулать. Çуртри пỹлĕмсене, ĕç кабинечĕсене ăшăпа илем кỹрĕç вĕсем. Искусствăна юратакансене пурне те район музейне выставкăна çитсе курма йыхравлатпăр. Курав икĕ уйăха пырать. Ырă сунса кĕтетпĕр.