Пирĕн ветерансем хушшинче Комсомольскинче тата çывăхри ялсенче пурăнакансем те пур. Çавна пулах вĕсемпе час-часах тĕл пулма çук. Анчах та нумай çул хушши пĕрле ĕçлесе канăва кайнă юлташсемпе курса калаçас килетех. Çакăн валли пирĕн Ваттисен кунĕ пур. Пирĕн администраци çак уява октябрĕн 7-мĕшĕнче мĕнпур ветерансен патне йыхрав хучĕсем ячĕ. Тĕлпулăва Комсомольскинчи РСУ директорĕ В.В.Максимов уçрĕ, ветерансене сывлăх сунса тав сăмахĕ каларĕ, тепĕр çулталăкран татах та çак йышпах тĕл пуласчĕ терĕ. Район администрацийĕн пуçлăхĕн çумĕ Б.М.Каринкин хăйĕн сăмахĕнче пур ветерана та сывлăх сунчĕ, тав сăмахĕ каларĕ. "Эсир çăмăл мар ĕçре ĕçлесе çĕнĕрен-çĕнĕ çуртсем çĕклесе хута ятăр, ремонт ĕçĕсене те хăвăрах туса пытăр",- терĕ вăл. Тивĕçлĕ канурисем хăйсене çакăн пек хисеп тунăшĕн РСУ директорне В.В.Максимова тав турĕç. Аяккарах пурăнакансене килĕсене автобуспах ăсатсах ячĕç. Çакă вăл ватăсемшĕн питĕ кăмăллă пулчĕ.

Первоисточник: "Каçал Ен"