Районти сунарçăсемпе пулăçсен обществин членĕсем хăйсен конференцине ирттерчĕç. Вăл 5 çулта пĕрре пулать. Унта общество членĕсем правлени, совет тата вĕсен председательне, ревкомисси председательне суйлаççĕ, пурнăçланă ĕçсемпе паллашаççĕ, малашнехи тĕллевсене палăртаççĕ. Конференцие общество председателĕ В.С.Васильев ертсе пычĕ. Малтанах 5 çулта туса ирттернĕ ĕçсемпе паллаштарчĕ. Обществăра паянхи кун 63 член шутланса тăрать. Шел пулин те, взнос укçи тỹлеменнипе сунарçăсене обществăран кăларма тивнĕ. Общество чылай ĕç туса ирттернĕ. Сунара çỹрени çеç, мар общество членĕсем çутçанталăка упрас енĕпе чылай ĕç тăваççĕ. Чĕрчунсемпе вĕçенкайăксен йышне ỹстерме майсем туса парасси те вĕсен тĕллевĕ. Василий Софронович хăйĕн сăмахĕнче саккуна пăсса сунара тухакансем (браконьерсем) пурри пирки те пăшăрханса пĕлтерчĕ. Вĕсемпе те общество членĕсен кĕрешме тивет. Мулкачсен йышĕ ỹсни палăрать. Фара çутипе вĕсене вĕлереççĕ. Районти шалти ĕçсен пайĕпе, çутçанталăка сыхлас енĕпе ĕçлекен специалистпа пĕрле общество рейд-сем ирттернĕ, йĕркене пăснă тĕслĕхсемпе протоколсем çырнă. Юлашки çулсенче обществăна кĕрекенсен йышĕ сахал, уйрăмах çамрăксем çук. Обществăри сунарçăсем хуçасăр йытăсене перес енĕпе те чылай ĕçленĕ. Вăрманти чĕрчунсене валли апат хурса панă. Сунара çỹремелли лаптăка 28,7 пин гектартан 38,3 пин гектара çити пысăклатма май тупнă. Пĕр сăмахпа каласан сунарçăсен ĕçĕ тĕрлĕ енлĕ пулнă. Ревизи комиссийĕн отчечĕ взнос укçипе мĕнле усă курнине уçăмлатрĕ. Сунарçăсемпе пулăçăсен республикăри общество председателĕ О.И.Поляков сунар ĕçĕ Раççейре, республикăра мĕнле аталанса пынине тĕслĕхсемпе çирĕплетсе пачĕ. Аталану йывăрпа пырать. Йывăрлăхран тухмалли майсем шырама тăрăшаççĕ. Взнос укçи çеç çителĕксĕр. Пулă промыслипе, сунарçă, пулăçă хатĕрĕсем сутакан магазинсемпе ĕçлеме тивет, ытти меслетсемпе те усă кураççĕ. Н.Г.Кокшин егерь хăйĕн ĕçĕ-хĕлĕ çинче чарăнса тăчĕ. Чĕрчунсене шута илес енĕпе, аншлагсене çĕнетес енĕпе ĕçлемеллине палăртрĕ. Сунар ĕçĕн ветеранĕ С.К.Совин сунарта йĕркелĕх хуçаланмаллине, сунар этикине тытса пымаллине палăртрĕ. Сунар йыттисемпе ĕçлессине лайăхлатас ыйтăва хускатрĕ. В.И.Макаров охотовед, шалти ĕçсен пайĕн инспекторĕ М.М.Арифуллин тухса калаçрĕç. Сунарçăсем пĕр саслăн пулса малашне тата 5 çул обществăна ертсе пыма В.С.Васильевах шанчĕç. Совет тата правлени, ревизи комиссийĕн членĕсене суйларĕç. Сунарçăсемпе пулăçăсен республикăри обществин 18-мĕш конференци ĕçне хутшăнма çын уйăрчĕç. Малашне тумалли ĕçсемпе тĕллевсене палăртрĕç. .