Районта ял хуçалăх отраслĕнче 20 ял хуçалăх кооперативĕ, 2 колхоз, фермер хуçалăхĕ- 3, агрофирмăсем- 2, 2 ООО, 1 патшалăх учрежденийĕ уй-хир культурисем туса илес енĕпе вăй хунă. Япăх мар ĕçленĕ вĕсем. Пĕрчĕллĕ тата пăрçа йышши культурăсем, çĕрулми, тымарçимĕç, выльăх апачлĕх культурăсем туса илнĕ. Тухăçĕ те пĕчĕк мар. Уйрăмах кăçал çĕрулми ăнса пулнă. Республикăра пĕтĕмпе туса илнĕ "иккĕмĕш çăкăрăн" пысăк пайне пирĕн район çи-тĕнтерниех мĕне тăрать! "Слава картофелю" агрофирма вара республикăра çĕрулмирен халиччен нихăçан пулман тухăç, кашни гектар пуçне 387 цент-нер илнĕ. "Рассвет" ЯХПКан тухăçĕ те 300 центнертан иртнĕ. Пирĕн район çыннисем чăннипех те çĕрулмипе ĕçлеме пĕлеççĕ. Вăл культурăпа çеç мар, ытти енĕпе те. Кăçал пĕлтĕрхинчен 38 процент ытларах е пурĕ 23234 тонна тырă пуçтарса илнĕ. Выльăх апачĕ те нумай хатĕрленĕ. 6 пин тонна утă, 27 пин тонна сенаж, 3 пин тонна силос, 6 пин тонна выльăх кăшманĕ, 8 пин тонна тырă фуражĕ выльăхсене хĕл каçма янтăланă. 100 гектар çĕр пуçне сĕт туса илес енĕпе пирĕн район республикăра 2-мĕш вырăн йышăнать. Ĕçне кура тупăшĕ. Иртнĕ çул ял хуçалăх предприятийĕсем 28 миллион тенкĕ таса тупăш илнĕ пулсан, кăçал çулталăк вĕçленнĕ тĕле ку кăтарту 30 миллион ытла тенкĕрен те иртмелле. Хуçалăхсем ĕç укçине те вăхăтрах парса пыма тăрăшаççĕ. Ку енĕпе 1 уйăхран ытларах парăмлă ял хуçалăх предприятийĕсем çукпа пĕрех. Хуçалăхсем выльăх-чĕрлĕх ăратлăхне ỹстерес, вăрлăх пахалăхне çĕнетес, çĕр пулăхлăхне лайăхлатас тĕлĕшпе те чылай ĕçленĕ. Вĕсене çак енĕпе патшалăх та пулăшу панă. Çак сăмахсем тата ытти кăтартусем те пулчĕç ялхуçалăх управленийĕн начальникĕн Г.М.Киргизовăн сăмахĕнче. Вăл ял хуçалăх отраслĕн кашни подразделенийĕнчи лару-тăрупа тĕплĕн паллаштарчĕ, тишкерсе тухрĕ. Ял хуçалăх тата тирпейлекен промышленноçра ĕçлекенсен районти уявне район администрацийĕн пуçлăхĕ Г.Ф.Волков уçрĕ. Ял хуçалăхĕнче ĕçлекенсене ăшшăн саламларĕ, малашне ăнăçусем сунчĕ. Районти ĕçченсем кăçал тăрăшуллă, хастар ĕçленине палăртрĕ. ЧР Ял хуçалăх министерствин выльăх-чĕрлĕх тата ăратлăх енĕпе ĕçлекен уйрăм начальникĕ В.Н.Герасимов та район пĕтĕм енĕпе аталанса, çирĕп-ленсе пынине пĕлтерчĕ. Салам сăмахĕсемпе пĕрлех пирĕн район республика шайĕнче лайăххисен шутĕнче пулнине палăртрĕ. Вăл "Культура", "Луч", "Дружба" хуçалăхсенчи нумай çул ĕçлекен В.В.Рябчикова, В.Н.Николаева, К.М.Алексеева ЧР Ял хуçалăх министерствин грамотине парса чысларĕ. Ял хуçалăх ĕçченĕсене ЧР Патшалăх Канашĕн депутачĕ, "Урожай" колхоз председателĕ А.Н.Ершов саламларĕ. Салам сăмахĕсемпех "Кĕтне" ентешлĕх ертỹçи В.В.Туркай, "Лад" строительство организацийĕн генеральнăй директорĕ В.Н.Гордеев тухса калаçрĕç. Вĕсем хăйсем çуралса ỹснĕ районпа мăнаçланни пирки пĕлтерчĕç. "Чувашия-Поддержка" страхлакан фирмăн районти филиалĕн директорĕ А.Ш.Минибаева хăйсемпе килĕштерсе ĕçлекен ял хуçалăх предприятийĕсемпе вĕсен ертỹçисене Хисеп грамотисем, парнесем пачĕ. Агропромышленноçра ĕçлекенсен профсоюзĕн районти комитечĕн председателĕ Ю.С. Тимофеев, район администрацийĕн пуçлăхĕ Г.Ф.Волков, ял хуçалăх управленийĕн начальникĕ Г.М.Киргизов ĕçре малта пыракан хуçалăхсене, ĕçлекенсене Хисеп грамотисемпе хаклă парнесем пачĕç. Пысăк "Ылтăн пучах" приза "Слава" ял хуçалăх кооперативĕ тивĕçрĕ. Кунта уй-хиртен усă курнă 1 гектар çĕртен условнăй выльăх апачĕн виçипе шутласан 36,4 центнер продукци туса илнĕ. Пĕчĕк "Ылтăн пучах" приз кăçал "Луч" ял хуçалăх кооперативĕн бригадине куçрĕ. Унти ĕçченсен кăтартăвĕ татах та пысăкрах. Кашни гектар пуçне- 40,5 центнер. Пухура районти ветстанци начальникне Р.М.Велимухаметова "ЧР ветеринари тава тивĕçлĕ ĕçченĕ" хисеплĕ ят пани çинчен пĕлтерекен удостоверени тата медаль пачĕç. Юлашкинчен районти культура ĕçченĕсем пысăк концерт кăтартрĕç. Чăваш, тутар, вырăс юрри-ташшине куракансем хапăлласа йышăнчĕç.