ЧР Ял хуçалăх министерстви Чăваш Республикин Министрсен Кабинечĕн 2005 çулхи пуш уйăхĕн 28-мĕшĕнче "Чăваш Республикин Президенчĕн 2005 çулхи нарăсăн 17-мĕшĕнче "Ял производство сферинче ертỹçĕсен кадрĕсемпе тивĕçтерес енĕпе патшалăх енчен хушма пулăшу парасси çинчен" кăларнă Указне пурнăçламалли мерăсем çинчен" йышăнăвне пурнăçласа яллă вырăнсенчи производство сферинче ĕçлеме ертỹçĕсен кадрĕсене суйласа илмелли конкурса малалла тăсасси çинчен пĕлтернĕччĕ ĕнтĕ. Кăмăл пуррисенчен документсем йышăнасси малалла пырать. Чăваш Республикин Правительстви кăçал 7 лару ирттернĕ. Ял хуçалăх министерствине яллă вырăнти производство сферинче ĕçлеме кайма ыйтса 68 çын заявлени панă. Вĕсем 19 районтан пулнă. 6 кандидатăн бизнес-проекчĕсене йышăннă. 15 кандидат яла ертỹçĕ пулса ĕçлеме каймашкăн килĕшмен е вĕсен кандидатурине çирĕплетмен. 41 кандидат ыйтăвне Правительство комиссийĕн ларăвĕн-че çитес вăхăтра пăхса тухаççĕ. ЧР Ял хуçалăх министерстви кандидатсем хăйсен бизнес-проектне тата тĕллевĕсене пурнăçлама май пур хуçалăхсене палăртнă. Вĕсем пурĕ 49. Пирĕн районта ун пеккисем: тырă çитĕнтерекен "Нива" агрофирма ООО, тырă, сĕт тата аш-какай туса илекен "Дубрава" тата "Красное Сормово" ял хуçалăх производство кооперативĕсем. Списока кĕнĕ хуçалăхсен йышĕ Патăрьел районĕнче _ 9, Елчĕк районĕнче _ 3, Шăмăршă районĕнче _ 2. Вĕсем хушшинче панкрута лекнĕ хуçалăхсем те, çĕнĕрен туса хунисем те пур. Хуçалăхсем тĕпрен илсен тĕштырă, çĕрулми, сĕт тата аш-какай туса илес енĕпе ĕçлеççĕ. Районти пултаруллă, мал ĕмĕтлĕ çынсен ертỹçĕсем пулма бизнес-проект хатĕрлесе хăйсен кандидатурисене ЧР Ял хуçалăх министерствине тăратмалла. Çамрăксем, тен, сирĕн хушăра та ял хуçалăх кооперативĕн председателĕ, фермер хуçалăхĕн ертỹçи пулас, ăна аталантарса Европăри аталаннă çĕршывсенчи ял хуçалăх предприятисене çитес тĕллевлисем пур? Вăйăрсене тĕрĕслесе пăхма пултаратăр.