Паян ĕçпе тивĕçтерекен центрта ĕçсĕрлĕхри 216 çын шутра тăрать. Вĕсене ĕç тупса парас тесе тĕрлĕ майсемпе усă курса ĕçлетпĕр. Ун çинчен район çыннисене "Каçал ен" страницисенче пĕлтерсех тăратпăр. Çапах та ĕçсĕр тăрса юлнисен, ĕç шыракансен шучĕ çулсерен пĕр пекрехех тăрать-çке. Çĕнĕ специальность илес текеннисене вара тĕрлĕ курс-сенче вĕренме те майсем туса паратпăр. Акă, кăçалхи октябрĕн 16-мĕшĕнчен пуçласа районти ял хуçалăх управленийĕ çумĕн-че тракторист-машинистсене хатĕрлекен курс уçăлчĕ. Районти ĕçпе тивĕçтерекен центр урлă унта 13 çын çĕнĕ специальность илме хатĕрленет. Вĕсен виçĕ уйăх çурă вĕренмелле, февральте алла тивĕçлĕ документ илсе тухаççĕ. Унсăр пуçне декабрь уйăхĕнче çакăнта каллех трактористсем, газоэлектросварщиксем (3 уйăх), газ котельнăйĕсен операторĕсем (2 уйăх) вĕренме пуçламалла. Специальноçлă пулас текенсем районти ĕçпе тивĕçтерекен центра килме пултараççĕ. Çак курс-сенче вĕренни ĕçсĕрлĕхри çынна питĕ меллĕ, мĕншĕн тесен вĕренỹри пĕтĕм тăкаксене ĕçпе тивĕçтерекен центр хăй çине илет.