Çак кунсенче шкул ачисем хушшинче баскетболла выляса мала тухассишĕн турнир пулса иртрĕ. Хĕрачасем хушшинчи тытăçура чи ăста вылякансем Комсомольски 2-мĕш вăтам шкулĕн команди пулчĕ, пĕрремĕш вырăн çĕнсе илчĕ. Иккĕмĕш вырăна Анат Тимĕрчкасси вăтам шкулĕн баскетболисткисем тивĕçрĕç. Виççĕмĕш призер- Комсомольски 1-мĕш вăтам шкулĕн команди. Арçын ачасем хушшинчи тытăçусем те çав тери çивĕч иртрĕç. Кунта каллех Комсомольски 2-мĕш вăтам шкулĕн туслă команди хăйĕн ăсталăхĕпе палăрчĕ, пĕрремĕш вырăна хăйĕн аллинчен вĕçертмерĕ. Нĕркеçсем иккĕмĕш, шурутсем виççĕмĕш вырăнсене çĕнсе илчĕç. Комсомольски вăтам шкулĕн арçын ачасен команди Шăмăршăра иртнĕ баскетболистсен Кăнтăр районсен зонăри турнирне те хутшăнчĕ. Района çĕнтерỹпе таврăнчĕ. Комсомольски 2-мĕш вăтам шкулĕнче Юрий Боровков физкультура учительне асăнмасăр хăварма çук. Вăл ачасене баскетбол вăййине явăçтарассишĕн ырми-канми тăрăшать. Хăшпĕр шкулсенче вара спортзалсем те, физкультура учителĕсем те пур. Анчах ачасене баскетбол спорчĕпе явăçтарассишĕн тăрăшни палăрмасть. Çакăн пирки Аслă Чурачăк, Хирти Явăш, Кĕçĕн Çĕрпỹел, Хырай Ĕнел вăтам шкулĕсенче ачасене пĕлỹ тĕнчине илсе кĕрекенсене аса илтерсе хăвармалла. Шкула çỹрекенсем баскетболла выляма та пĕлмеççĕ вĕт.