Эпир, районти ялсенчи библиотека ĕçченĕсем, пĕр-пĕрин ĕçĕнчи çĕнĕлĕхсемпе паллашсах тăратпăр, мероприятисен пахалăхне, пĕлтерĕшне ỹстерме тăрăшатпăр. Çавăнпах пулĕ ĕçри кăтартусем те аванлансах пыраççĕ тетпĕр. Ку ĕçре пире районти культура пайĕ те, районти тĕп библиотека та пысăк пулăшу параççĕ. Эпĕ хамăн ĕçре яланах ялти (Хирти Явăшри) вăтам шкулăн коллективĕпе çывăх çыхăну тытса ĕçлеме тăрăшатăп. Мĕншĕн тесен ялсенчи библиотекăсем тĕрлĕ организацисемпе çывăх çыхăну тытса ĕçлени икĕ еншĕн те усăллă пулнине эпĕ уçăмлăн куратăп. Ноябрĕн 10-мĕшĕнчен пуçласа ноябрĕн 21-мĕшĕччен Хирти Явăш шкулĕнче ялти библиотекăпа пĕрле мероприятисем иртрĕç. Библиотекăра хаçат журналсем нумаях мар. Çавăнпа та районтан ача-пăча библиотекинчен "Нарконет" журнала илсе килсе обзор ирттертĕмĕр. Ачасем классенче "Бич-21 века" кĕнеке выставкипе паллашрĕç. Выставкăри кĕнекесем наркотиксем мĕнле сиен кỹнине, çыннăн пурнăçне татнине, наркотикпа чирлĕ çынсенчен аяккарах пулмаллине ăнлантарса параççĕ. Пĕтĕмлетỹ туса хăйсен класĕнче А.Ш.Садертдинова, Г.Х.Шакурова, О.Д.Казакова, Г.И.Давыдова, Т.М.Васильева, Л.А.Мансурова ачасемпе анкетировани ирттерчĕç тата ачасене пирус туртни, эрех ĕçни мĕнлерех сиен кỹнине ăнлантарчĕç. Çамрăк ачасем тутанса пăхакан пĕрремĕш наркотик вăл- пирус туртни тата эрех ĕçме пикенни. Çак мероприятисене эпир ачасем усал çулпа мар, ырă та лайăх çулпа утчăр тесе ирттеретпĕр.