Декабрĕн 1-мĕшĕнче район администрацийĕн çурчĕн ларусем ирттермелли залĕнче районти ĕçпе вăрçă ветеранĕсен организацийĕсен председателĕсен черетлĕ канашлăвĕ пулса иртрĕ. Унăн ĕçне ял администрацийĕсен пуçлăхĕсем те хутшăнчĕç. Канашлăва кĕске сăмах каласа районти ĕçпе вăрçă ветеранĕсен совечĕн председателĕ Ю.С.Тимофеев уçрĕ. Вăл юлашки вăхăтра "Ветерансем çинчен" саккунра, тĕрлĕ категорие кĕрекен ветерансене çăмăллăхсем парассинче улшăнусем пурри пирки чарăнса тăчĕ. Районти социаллă хỹтлĕх пай заведующийĕ И.А.Никитина Чăваш Республикинче пурăнакан хăшпĕр категорисене кĕрекен граждансене уйăхсерен укçан тỹлесе пымалли йĕрке çинчен каласа пачĕ. Çак тĕлĕшпе Чăваш Республикин ку енĕпе ноябрĕн 10-мĕшĕнче йышăннă постановленийĕпе паллаштарчĕ, хăйĕн калаçăвне ăна тĕпе хурса йĕркелерĕ. Пенси фончĕн управленийĕн районти уполномоченнăйĕ З.В.Каринкина граждансене пенсипе тивĕçтерес ыйтусене çутатса пачĕ. Докладчиксем патне ыйтусем нумай пулчĕç, канашлăва хутшăннисем вĕсем çине тивĕçлĕ хурав илчĕç. Ĕçпе вăрçă ветеранĕсемпе иртекен мероприятисене район пуçлăхĕ Г.Ф.Волков нихăçан та хутшăнмасăр юлмасть. Хальхинче те вăл канашлу ĕçне пĕтĕмлетсе ветерансен совечĕ-сен председателĕсен, ял администрацийĕсен пуçлăхĕсен нумай ыйтăвĕсем çине тулли хурав пачĕ. Канашлу ĕçне районти ĕçпе вăрçă ветеранĕсен совечĕн председателĕ Ю.С.Тимофеев йĕркелесе пычĕ.