Армспортăн республика шайĕнчи ăмăртăвĕсем декабрĕн 3-мĕшĕнче Комсомольски 2-мĕш вăтам шкулĕнче иртесси пирки район хаçатĕнче эпир чылай малтан пĕлтернĕччĕ. Палăртнă кун çывхарса та çитрĕ. Çак кун 9 сехет тĕлне асăннă шкула армреслинг кĕрешĕвне юратакан 60 ытла спортсмен килсе çитрĕ. Вĕсенчен 25-шĕ хĕрарăмсемпе хĕр-ачасем. Турнира пурĕ 7 команда хутшăнчĕ. Хăнасем Шупашкартан, Елчĕкрен, Патăрьелĕнчен пулчĕç. Пирĕн район спортсменĕсем те ăмăртусене йышлăн хутшăнчĕç. Тытăçусем пуçланас умĕн спортсменсене Чăваш Республикин армреслинг спорчĕн Федерацийĕн президенчĕ В.Смоленцев, республикăри "Урожай" физкультурăпа спорт обществин (агропромышленность комплексĕнче ĕçлекенсен обществи) председателĕн çумĕ А.Осипов тата ыттисем саламларĕç, тытăçусенче ăнăçу сунчĕç. Хĕрỹ кĕрешỹсем пуçланчĕç. Шупашкартан килнĕ Екатерина Васильева 52 килограмм таранхи виçере сылтăм алăпа вăй виçсе пĕрремĕш вырăн çĕнсе илчĕ. Марина Степанова (вăл та Шупашкартан) 58 килограмлисем хушшинче республика чемпионĕ ята тивĕçрĕ. Канаш хулин командинчи Екатерина Федорова (65 килограмм), Наташа Иванова (65 килограмран пысăкрах виçере) пысăк пултарулăхпа палăрчĕç, республика чемпионĕсем пулса тăчĕç. Пирĕн районти Хирти Явăш вăтам шкулĕн учительници Галина Давыдова хăйĕн виçинче вăй виçсе иккĕмĕш вырăна тивĕçрĕ. Елчĕкрен килнĕ Михаил Смирнов 56 килограмм таранхи виçере, Шупашкар спортсменĕ Евгений Герасимов 62 килограмлисемпе вăй виçсе турнирăн пĕрремĕш парнисене çĕнсе илчĕç. Пирĕн район спортсменĕсем те хăйсен ятне ямарĕç, район чысне çỹлте тытрĕç. Александр Тимофеев (69 килограмм), Ильдус Табаев(77 килограмм), Аймет Зарипов(87 килограмм), Марат Каримуллин (87 килограмран пысăкрах виçере) республика чемпионĕн лентисене çĕнсе илчĕç. Асанкасси çамрăкĕ Владислав Иванов хăйĕн виçинче çивĕч тытăçусенче иккĕмĕш вырăна тивĕçрĕ. Абсолютлă чемпион ята çĕнсе илессишĕн спортсменсем сылтăм тата сулахай алăсемпе кĕрешрĕç. Кунта вара пирĕн район командинчи Ильдус Табаева никам та çĕнтереймерĕ. Армспорт енĕпе республикăн абсолютлă чемпионĕ ята çĕнсе илчĕ. Иккĕмĕшпе виççĕмĕш вырăнсем те пирĕн спортсменсенех- Аймет Зариповпа Рашид Хамбиковăн. Çапла вара "Урожай" спорт обществин спартакиадин турнирĕн таблицине армреслинг спорчĕн район команди сахалах мар очко çырса хучĕ.