Пирĕн районта Совет Союзĕн 5 Геройĕ çуралса ỹснĕ. Ентешĕмĕрсем паттăрсене манăçа кăлармаççĕ. Акă, Асанкасси ялĕнче кун çути курнă Ф.Н.Чернова асăнса ирĕклĕ майпа кĕрешекенсен турнирне çулсеренех йĕркелеççĕ. Кăçал вунпиллĕкмĕш хут иртрĕ вăл. Халиччен ăмăртусене Асанкасси вăтам шкулĕнче йĕркеленĕ пулсан, ку хутĕнче спортсменсем Комсомольски 2-мĕш вăтам шкулне пуçтарăнчĕç. Республика шайĕнчи тупăшусене хамăрăн кĕрешỹçĕсемсĕр пуçне Елчĕк, Канаш, Красноармейски, Патăрьел, Хĕрлĕ Чутай районĕсенчен, Ульяновск облаçĕнчи Нагаткинăран та килсе çитрĕç. Икçĕре яхăн спортсмен кавир çине тухма кăмăл тунă. Турнира Аслă Отечественнăй вăрçăра çĕнтерỹ тунăранпа 60 çул çитнине халалланă. Ăна уçнă май саламласа район пуçлăхĕ Геннадий Волков, ЧР физкультурăпа спорт, туризм министрĕн çумĕ Юрий Николаев, Комсомольски 2-мĕш вăтам шкулĕн директорĕ Геннадий Длинов спортсменсене ăнăçу сунчĕç. Кĕрешỹçĕсем 13 виçе категорийĕнче, икĕ кавир çинче харăс ăмăртрĕç. 1988-1990, 1991-1993 çулсенчи арçын ачасемпе хĕрачасем вăй виçрĕç. Пĕчĕкскерсен, кĕрешỹ вăрттăнлăхĕсене тин алла илекенсен кĕрешĕвне сăнама уйрăмах кăсăклă пулчĕ. Кĕçĕннисен ушкăнĕнче пирĕн çамрăк спортсменсем пысăк çитĕнỹсем тунишĕн вара епле хĕпĕртемĕн? Акă, 30 килограмлă виçеллĕ хĕрачасем хушшинче Анат Тимĕрчкассинчи Ирина Николаева чи вăйли пулчĕ, чемпионка Ф.Н.Чернов призне çĕнсе илчĕ. Çак шкулти Максим Анисимов, иккĕмĕш, Эдуард Иванов виççĕмĕш вырăнсене йышăнчĕç. Асăннă спортсменсем ирĕклĕ майпа кĕрешекенсен секцине темиçе уйăх çеç çỹреççĕ-ха, кĕске хушăрах чемпионсем хатĕрлеме пултарни вара Валерий Денисов тренерпа Валерий Плешков физкультура учительне чăннипех чыс кỹрет. Асанкасси вăтам шкулне ирĕклĕ майпа кĕрешекенсен "лаççи" тесе калас килет. ЧР тава тивĕçлĕ учителĕн Геннадий Петуховăн, Вячеслав Яндров тренерăн воспитанникĕсем те çи-тĕнỹсемпе савăнтарчĕç. Ольга Денисова хăйĕнпе пĕр виçеллисем хушшинче чи вăйли пулчĕ. Кавир çине тухмассерен хăйĕнпе кĕрешекене çурăм çине хучĕ, финала тухса пĕрремĕш вырăн йышăнчĕ, ентешĕн призĕн хуçи пулса тăчĕ. Асанкасси каччисем хушшинче те маттуррисем, ăстисем пур. Хăйсен виçисенче тытăçса Николай Беловпа Алексей Яндров виççĕмĕш, Михаил Тимофеевпа Вячеслав Герасимов иккĕмĕш вырăнсене çĕнсе илчĕç. Комсомольскинчи кĕрешỹçĕсем те ăмăртура ячĕсене ямарĕç. Николай Краснов тренерĕн воспитанникĕсем Вячеслав Малышев 69 килограмлă категорире 2-мĕш вырăна тивĕçрĕ. Руслан Прокопьевпа Сергей Родионов хăйсемпе пĕр виçеллисем хушшинче виççĕмĕш призерсем пулса тăчĕç. Çĕнтерỹçĕсене ЧР физкультурăпа спорт министерствин Хисеп грамотисене, хаклă парнесем тата медальсем пачĕç. Ытти районсенчен килнĕ хăнасем турнира çỹллĕ шайра, аван йĕркеленине палăртрĕç, организаторсене тав сăмахĕ каларĕç. Комсомольски 2-мĕш шкулĕн столовăйĕнче кашни спортсменах вĕри апатпа хăналарĕç. Çапах пĕр çитменлĕхе- ачасен культурăсăрлăхне те палăртса хăварас килет. Буфетра туяннă канфет-шăкалат хучĕсем, полиэтилен савăчĕсем спорт залĕнче пĕр-пĕр ярмăркка хыççăнхи пек выртса юлчĕç. Коридорта, спортзала кĕнĕ вырăнта çỹп-çап пăрахма вара ятарлă курупкăсем вырнаçтарнăччĕ... Сăмахăма çак кăмăлсăр нота çинче вĕçлес килмест. Килес çул Совет Союзĕн Геройĕ Ф.Н.Чернов ячĕллĕ турнир 16-мĕш хут кĕрешỹçĕсене Асанкассинче пуçтарĕ. Ирĕклĕ майпа кĕрешме хăнăхтарас ĕçре нумай вăй хунă Г.Петухов тренерăн çур ĕмĕрхи юбилейĕпе те пĕр килет вăл. Ун чухне ăмăртусене хутшăнакансем тата йышлăрах та пуласса шанас килет.