Районти ЗАГС уйрăмĕнче çулталăк пуçланнăранпа çичĕ ача çуралнине регистрациленĕ. Çакă интереслĕ: çемьесене аист çичĕ хутĕнче те арçын ача илсе килнĕ. Вăрманхĕрри Чурачăкри Пушкинсен вара икĕ хут савăнăç- вĕсен йĕкĕреш çуралнă. Еленăпа Александр ывăлĕсене Артем тата Артур ятсем панă. Йытă çулĕ пуçланнăранпа 7 çемье çуралнă. Паян ЗАГС уйрăмĕнче тепĕр 6 мăшăр çемье çавăрни çинчен хут уйăрттарĕ. Вĕсене пурнăçра пĕр-пĕрин çине йытăлла "вĕрме" мар, çак ăслă чĕрчун пек шанчăклă упăшкапа арăм пулма сĕнес килет.

Районта Раштаври волейбол турнирĕ ирттересси йăлана кĕнĕ. Кăçал çак тупăшусем Чĕчкен тĕп шкулĕн спортзалĕнче пулчĕç. Унта 13 команда хутшăннă. Çĕнтерỹçĕсене икĕ ушкăнра палăртнă. Пĕрремĕш ушкăнра Нĕркеç ялĕн команди çĕнтернĕ. Иккĕмĕшпе виççĕмĕш вырăнсенче- "Кооператор" производство комбиначĕн тата "Алга" ял хуçалăх кооперативĕн командисем. Иккĕмĕш ушкăнра вара "Кĕтне" ентешлĕх команди мала тухнă. "Чувашрегионгаз" ОАО тата Тăвай район командисем ун хыççăнхи вырăнсене тивĕçнĕ. Çĕнтерỹçĕсене куçса çỹрекен кубоксем, хаклă парнесем панă.

Районти сĕт-çу фермисем кăçал кашни ĕне пуçне 9 килограмм ытла сĕт суса илеççĕ е пĕлтĕрхи январь уйăхĕнчен 1 килограмм ытларах. Иртнĕ çул хуçалăхсем выльăх апачĕ чылай хатĕрленĕ, çакă хăйĕн витĕмне паратех. Сăвăм уйрăмах "Рассвет", "Асаново", "Восток" ял хуçалăх кооперативĕсенче пысăк. Унти ĕнесем кашни 14 килограма яхăн е ытларах та сĕт антараççĕ. Çак вăхăтрах "Дубрава", "Изамбаево", "Турхан" хуçалăхсенче кулленхи сăвăм 3-4 килограмран та иртмест.