Систермесĕр килсе çитнĕ кăрлач сиввисем хăйсен вăй-не чакарма шутламаççĕ. Çавна май январĕн 22-мĕшĕнче район пуçлăхĕ васкавлă лару ирттернĕ. Унта ял тăрăхĕн пуçлăхĕсем, предприяти, пурăнмалли çурт-йĕр тата коммуналлă хуçалăхсен ертỹçисем, пушартан сыхланас, ăшăпа тивĕçтерес тĕлĕшпе яваплă çынсем хутшăннă. Ларура район пуçлăхĕ Г.Волков ЧР Министрсен Кабинечĕн Председателĕн С.Гапликовăн çак енĕпе кăларнă хушăвĕпе килĕшỹллĕн тĕллевсем лартнă. Шартлама сивве пула çутçанталăк газĕпе усă курассине чакармалли çинчен каланă. Сивĕсем вăрах тăнăран, хутса ăшăнма газа нумай çунтарнă. Çавăнпа та предприятисене, организацисене, çуртсене ăшăтма мазутпа, çĕркăмрăкĕпе, вутăпа е электричествăпа усă курма сĕннĕ. Паянхи куна районта энергипе ăшăтакан система йĕркеллĕ режимпах ĕçлет. Системăна йĕркелесе тăма унта ĕçлекенсем талăкĕпе ятарлă дежурство йĕркеленĕ. Çавăнпа та ума тухакан йывăрлăхсене вăхăтра татса парас тĕлĕшпе кирлĕ мерăсем йышăннă.