Нарăсăн 5-мĕшĕнче "Раççей йĕлтĕр йĕрĕ-2006" ятпа ирттерме палăртнă ăмăртăва сивĕ çанталăка пула республикăра каярах вăхăта хăварчĕç. Апла пулин те хăш-пĕр çĕрте çав кун ахаль иртмерĕ - чылай çын йĕлтĕр çине тăрса вăй-халне тĕрĕслерĕ, çут çанталăк илемĕпе киленчĕ. Комсомольски районĕнчи Элпуç ял тăрăхне пилĕк ял кĕрет. Кашни ялĕнчех çав кун сывă пурнăç йĕркине мала хуракансем йĕлтĕр сырса чупма тухрĕç. Ăмăртăвăн тĕп пайĕ Хирти Явăшра иртрĕ. Унта 40 яхăн çын хутшăнчĕ. Çав шутрах Элпуç ял тăрăхĕн ертỹçи Николай Носов тата "Дружба" ял хуçалăх кооперативĕн пуçлăхĕ Ремис Мансуров та. Йĕлтĕр спортне кăмăллакансен йышăнче тĕрлĕ професси çыннисем. Вĕсенчен чи кĕçĕнни - 7 çулти Марат Сейфуллов, чи асли вара унăн 54 çулхи кукамăшĕ - Мария Ильязова. Старта тăнисем пурте пĕр çухрăма чупса тухрĕç. Ун хыççăн вĕри чей ĕçсе ăшăнчĕç, икерчĕпе сăйланчĕç.