Районти искусство шкулĕн Аслă Чурачăкри филиалĕнчи ачасен "Тевет" фольклор ушкăнне ял çыннисем çеç мар, район çыннисем те аван пĕлеççĕ. Вĕсем пĕрре мар тĕрлĕ фестивальсемпе конкурссене хутшăннă, çĕнтерỹçĕ ята çĕнсе илнĕ. Ачасем юрлама-ташлама юратнипе пĕрлех шкулта та тăрăшса вĕренеççĕ. Вĕсене час-часах ял библиотекинче те курма пулать. Кĕнекесемпе туслă пулни ачасен тавракурăмне анлăлатма пулăшать. Фольклор ансамблĕ пулсан ачасен хамăр халăхăн ĕлĕкхи юррисене, такмакĕсене, юмахĕсемпе кăларăмĕ-сене лайăх пĕлмелле. Ушкăна çỹрекенсем çаксене пикенсех вĕренеççĕ. Акă, нумаях пулмасть вĕсем Аслă Чурачăк вăтам шкулĕнче нумай çул чăваш чĕлхипе литературине вĕрентнĕ Ф.Я. Черновăпа тĕлпулу ирттерчĕç. Феодосия Яковлевна ачасене чăваш халăх юррисемпе, ташшисемпе, вăййисемпе паллаштарчĕ. Хăйĕн ачалăхне аса илчĕ. Авалхи йăла-йĕркесем çинчен тĕплĕн каласа пачĕ. Пĕчĕк артистсем ăна нумай-нумай ыйту пачĕç. Ф.Чернова вĕсем çине кăмăлтан хуравласа пычĕ.