Февралĕн 23-мĕшĕ- Çĕршыва хỹтĕлекенсен уявĕ. Канăва усăллă та интереслĕ ирттерес тесе çак кун Сывлăх кунне йĕркелеме йышăнчĕç. Палăртнă ир Комсомольски вăрманĕ хĕррине йĕлтĕр спортне юратакансем йышлăн пуçтарăнчĕç. Кунта ваттине те, вĕттине те курма пулчĕ. Район администрацийĕн тĕрлĕ пайĕсенче ĕçлекенсем, ял поселенийĕсен пуçлăхĕсемпе специалисчĕсем, предприятисенчи рабочисем, шкул ачисем, ветерансем тата ыттисем те. Кунĕ лăпкă та хĕвеллĕ, ăшă тăчĕ, кун пек чухне килте чăтса ларма çăмăлах мар çав. Район пуçлăхĕ Геннадий Волков йĕлме йĕлтĕр çине тăрса чи малтан вăрманалла çул тытни ыттисемшĕн те тĕслĕх пулчĕ, пурте çутçанталăк ытамне васкарĕç. Йĕлтĕрсĕр килнисем те ахаль тăмарĕç, волейболла вылярĕç. Сывлăх кунне хутшăннисенчен чи асли ĕçпе вăрçă ветеранĕ, 84 çулхи Ревокат Моисеев, чи кĕçĕнни Владик Хромов пулчĕç. Канăва çапла йĕркелени пурне те килĕшрĕ, вĕсем килĕсене тулли кăмăлпа саланчĕç. "Район администрацине çакнашкал Сывлăх кунĕсем йĕркеленĕшĕн тавах. Хамăр тĕллĕн пулсан йĕлтĕр çине тăрса тухма та вăхăт тупаймастпăр вĕт, ỹркеннни те пурах ĕнтĕ",- терĕç хĕрарăмсем, уçă сывлăшра ярăннипе хĕрелнĕ питлĕскерсем.