Иртнĕ юнкун районти культура çуртĕнче тĕрлĕ вăхăтра "Пайанхи сас", "Октябрь ялавĕ" ятпа тухса тăнă "Каçал ен" хаçат 75 çул тултарнă ятпа савăнăçлă каç пулса иртрĕ. Уява Шупашкартан, районсенчен ĕçтешсем, хаçат тусĕсем хутшăнчĕç. Культура ĕçченĕсем юрă-ташăпа савăнтарчĕç. Савăнăçлă каçа район администрацийĕн пуçлăхĕпе Г.Волковпа район хаçачĕн тĕп редакторĕ Л.Шуряшкина уçрĕç. Хăнасем пĕри те пушă алăпа килмен. Салам сăмахĕсемпе пĕрлех хаклă парнесем пулчĕç. ЧР культура, национальноçсен ĕçĕсен, информатика политикин тата архив ĕçĕсен министрĕн пичет енĕпе ĕçлекен çумĕ О.Петров, республикăри культура ĕçченĕсен профсоюз рескомĕн председателĕ С.Демидова, пичет ĕçĕнче чылай ĕçленĕ сотрудниксемпе обществăлла корреспондентсене Хисеп грамотисем парса чысларĕç. Министерство вара редакцие компьютер комплекчĕ парнелерĕ. "Хыпар" издательство çуртĕнче ĕçлекенсен ячĕпе тĕп редактор çумĕ Г.Максимов саламларĕ. Ăшă сăмахсемпе сцена çине тухакансем татах та чылайăн пулчĕç. Уява культура ĕçченĕ В.Курицына килĕшỹллĕ ертсе пычĕ.