Иртнĕ вырсарникун, мартăн 5-мĕшĕнче, район центрĕнчи площаде пухăннă çынсене çурхи хĕвел йăлтăр кулăпа кĕтсе илчĕ. Çак кун район çыннисем Вырăс хĕлне ăсатрĕç. Илемлĕ кĕвĕ пурне те уява йыхăрчĕ. Район администрацийĕн пуçлăхĕн пĕрремĕш заместителĕ, ял хуçалăх управленийĕн начальникĕ Г.М.Киргизов, ЧР ял хуçалăх министрĕн çумĕ С.П.Димитриев, Чăваш Республикин Патшалăх Канашĕн депутачĕ, "Урожай" колхозăн ертỹçи А.Н.Ершов пурне те Кĕçĕн çăварни, Вырăс хĕлне ăсатса ярса çуркуннене кĕтсе илнĕ ятпа тата çывхарса килекен Пĕтĕм тĕнчери хĕрарăмсен кунĕ - мартăн 8-мĕшĕ ячĕпе ăшшăн саламларĕç. Ырлăх-сывлăх, ĕçре ỹсĕмсем, пурнăçра телей сунчĕç. Пирĕн район 2005 çулта ял хуçалăх отраслĕнче продукци туса илес енĕпе виççĕмĕш вырăна тухнă. Çак ятпа района С.П.Димитриев III степеньлĕ Диплом пачĕ. Уяв программине районти культура çурчĕн работникĕсем уçрĕç. Вĕсем сивĕ хĕле ăсатса янине, çуркуннене кĕтсе илнине питĕ витĕмлĕ кăтартса пачĕç. Малалла художествăлла пултарулăх коллективĕсен концерчĕ пуçланчĕ. Сцена çине пĕр коллектив хыççăн тепри тухрĕ. Районти культура çурчĕ çумĕнчи "Шанчăк" фольклор ансамблĕн членĕсем, Александровкăри, Асанкассинчи, Тукайĕнчи, Чăваш Эльпуçĕнчи, Урмаелĕнчи, Хырхĕрринчи, Аслă Çĕрпỹелĕнчи тата ытти çĕртен килсе çитнĕ коллективсем пухăннисене савăк юрă-ташăпа савăнтарчĕç. Анчах хăшпĕр коллективсем хăйсем юрлас вырăнне фонограмма ярса çăварĕсене карса тăни куракансен кăмăлне хуçрĕ. Райпо системинче ĕçлекенсем, уйрăм сутуçăсем пурне те тутлă апат-çимĕçпе сăйларĕç, темĕн тĕрлĕ промышленность таварĕсемпе, апат-çимĕç продукчĕсем сĕнчĕç. Кăнтăрла иртсен районти культура çуртĕнче чăваш эстрада юрăçисен концерчĕ пулчĕ. Район центрĕнче çеç мар, ытти çĕрте те уяв мероприятийĕсем пулчĕç. Акă, тĕп библиотекăра Ăс-хакăл çутлăхĕн çулталăкне халалланă кĕнеке выставки ĕçлерĕ. Библиотекарьсем вулакансене чуна пуянлатма, пĕлĕве тарăнлатма пулăшакан изданисемпе паллаштарчĕç, вĕсене илсе вулама сĕнчĕç. Районти "Çĕр тата çынсем" музейран та çынсем татăлмарĕç. Музей ĕçченĕсем чăваш тĕррисен выставкине хатĕрленĕ. Чăн чăваш тĕррине, тĕрĕ меслечĕсене кăтартса паракан курава валли хĕрсем хăйсен вăйĕпе тĕрлĕ эрешсем çĕрĕ-çĕрĕпе тĕрленĕ. Халь кунта вĕсем шкул ачисемпе чăваш тĕррин урокне те ирттерме пултараççĕ. Уява тухнисем тĕрлĕ лентăсемпе, тутăрсемпе, шарсемпе илемлетнĕ лашасем чупнине те тулли кăмăлпа сăнарĕç. Çунасем çинчисем вара ăмăртса Çăварни юрри юрларĕç, такмаксем каларĕç. Пĕрер лаша кỹлнисем хушшинче "Красный маякран" килнĕ Анатолий Самарин лавĕ пĕрремĕш вырăна тухрĕ. Иккĕмĕш вырăнта- Александр Васильев (Атласкин фермер хуçалăхĕ). "Дубравăран" килнĕ Герман Ефремов тытса пыракан лаша вара виççĕмĕш вырăна тивĕçрĕ. "Дубовка" хуçалăхри Григорий Митюковăннисĕр пуçне виçĕ лаша кỹлнĕ лавсем урăх пулмарĕç. Çĕнтерỹçĕсене ялхуçалăх управленийĕ хаклă парнесемпе чысларĕ. Районти кирек хăш пысăк уяв та спорт вăййисĕр иртмест. Вырăс хĕлне ăсатнă кун та тĕрлĕ вăйăсемпе, ăмăртусемпе пуян пулчĕ. Вĕсенче кашниех хăйĕн вăйне тĕрĕслесе пăхма, ыттисемпе тупăшма пултарчĕ. Физкультурăпа спорт центрĕнче шашка вăййине кăмăллакансем пухăнчĕç. Арçынсем хушшинче, чи нумай очко пухса, Комсомольскинчи Н.Индюков çĕнтерỹçĕ пулса тăчĕ. Иккĕмĕшпе виççĕмĕш вырăнсене вара В.Голубевпа (Комсомольски) А.Волков (Нĕркеç) пайларĕç. Хĕрарăмсен хушшинче ĕç ветеранне Н.Степановăна çитекенни пулмарĕ. Хирти Мăнтăртан килнĕ А.Тимофеевăпа Н.Медведева- иккĕмĕш, виççĕмĕш вырăнсен хуçисем. Армреслинг вăййи район центрĕн варрине куракансене нумай пуçтарчĕ. 75 килограмм таранхи виçере В.Калашников, 75 килограмран йывăртараххисем хушшинче М.Каримуллин çĕнтерỹçĕсем пулчĕç. Кире пуканĕ йăтассинче те Владимир Калашникова çĕнме пултаракан тупăнмарĕ. Комсомольски 2-мĕш вăтам шкулĕнче волейболистсем вăй виçрĕç. Хĕрỹ тупăшура Нĕркеçрен килнĕ туслă команда тĕп приза çĕнсе илчĕ. Иккĕмĕш вырăнта- Комсомольскинчи "Кубня". Район администрацийĕн спортсменĕсем- виççĕмĕш вырăнта. Комсомольски 1-мĕш вăтам шкулĕнче ирĕклĕ майпа кĕрешессипе ăмăртусем иртрĕç. Тĕрлĕ виçесенче пĕрремĕш вырăн çĕнсе илнисенчен ытларахăшĕ- асанкассисем, Г.Петуховпа В.Яндров тренерсен воспитанникĕсем. Комсомольски, Тăманлă Выçли, Анат Тимĕрчкасси, Аслă Чурачăк, Урмаел ялĕсенчи атлетсем те палăрма пултарчĕç.