Нĕркеç ялĕнче Совет Союзĕн Геройĕн Г.Н.Чернов призне çĕнсе илессишĕн волейбол турнирне çулсеренех йĕркелеççĕ. Кăçал та март уйăхĕн 12-мĕшĕнче шкул спортзалне спортсменсемпе куракансем чылай пухăнчĕç. Турнира Комсомольски район пуçлăхĕ Г.Ф.Волков уçрĕ. Пурне те çитĕнỹсем тума вăй-хал сунчĕ. Çавăн пекех Хирти Сĕнтĕр ял поселени пуçлăхĕ Г.Е.Ефремов, "Госсорткомиссия" патшалăх учреждени ертỹçи Г.Н.Чернов сăмах каларĕç. Инçе çула пăхмасăрах Вăрнар, Тăвай районĕсен командисем те килсе çитнĕ. Чи малтанах инçетри хăнасем пĕр-пĕринпе тĕл пулчĕç. Вăрнар команди çĕнтерчĕ. Нĕркеç-1 команди Тăвайсене 2:1 шутпа парăнтарчĕ. Нĕркеç ялĕн иккĕмĕш команди те ăста вылярĕ. Виççĕмĕш вырăна тухассишĕн Тăвайпа Комсомольски районĕн командисем тупăшрĕç. Хĕрỹ вăйăра Тăвай спортсменĕсем 2:1 шутпа комсомольскисене парăнтарчĕç. Тепĕр вăйăра мала тухассишĕн Вăрнар командипе Нĕркеç-1 команди вылярĕç. Вăйă хĕрỹ иртрĕ. Иккĕшĕ те пĕр-пĕрне парăнасшăн пулмарĕç. Çапла майпа виççĕмĕш партие икĕ команда та çĕнсе илесшĕн пулчĕ. Çак вăхăтра залра ларакан çынсем кашни очкошăн савăнчĕç. Кăшкăрса, шăхăрса спортсменсене хавхалантарчĕç. Лару-тăру хĕрсе кайрĕ. В.Гладкова, А.Гладкова, М.Ефремова, Л.Иванова ывăлĕсемшĕн вăйă пĕтичченех ал çупса, хавхалантарса ларчĕç. Çивĕч тупăшура Нĕркеç-1 команди мала тухрĕ. Командăри спортсменсем: В.Димитриев, А.Ефремов, С.Иванов, А.Иванов, В.Гладков, С.Гладков пĕр-пĕринпе туслă, ăнланса вылярĕç. Çавна май çĕнтерỹçĕсем пулса тăчĕç. Вĕсене саламласа шкул спортзалĕнче чылайччен "Маттур!" тени янăрарĕ. Вĕсем куракансене ти-вĕçтермелле вылярĕç. Вăйăсем питĕ çивĕч те кăсăклă иртрĕç. Иккĕмĕш вырăнта- Вăрнар команди, виççĕмĕшсем- тăвайсем. Çĕнтерỹçĕсене парнесемпе Хисеп грамотисем парса чысларĕç. "Чи ăста тапăнса вылякан"- Алексей Ефремов (Нĕркеç-1 команда), "Чи ăста хỹтĕлевçĕ" С.Захаров (Тăвай), "Чи ăста çăмха паракан" В. Иванов (Вăрнар) тесе палăртрĕç. Вĕсене уйрăм парнесем пачĕç. Нĕркеç ялĕн команди кубока хăй аллинчен вĕçертмерĕ. Маттур! Малашне те çапла вылясса шанатпăр.