Кайăк-кĕшĕк грипĕ пĕтĕм тĕнчене пăлхатса ячĕ. Вăл е ку çĕршывра çак чир пиншер пуç кайăка пĕтерет. Унпа кĕрешес мерăсем йышăннă пулин те, вăл çĕнĕрен çĕнĕ çĕрсем çине çитет. Хăрушă чир пирĕн республикăна пырса кĕмĕ тесе никам та шантараймасть. Эпир район пуçлăхĕ Г.Ф.Волков планеркăра уйрăм хуçалăхсенчи чăх-чĕпе шута илес ыйтăва хускатни çинчен пĕлтернĕччĕ ĕнтĕ. Нумаях пулмасть вара ял тăрăхĕн пуçлăхĕсемпе черетлĕ канашлу пулчĕ. Унта кайăк-кĕшĕк грипĕпе сыхланас тĕлĕшпе тĕрлĕ ыйтусене пăхса тухрĕç. Чăх-чĕпе кайăк-кĕшĕк грипĕпе чирлесрен сыхлас тесен, санитарипе ветеринари нормисене, правилисене тĕрĕс пăхăнса, туллин пурнăçламалла. Кĕçех кăнтăртан вĕçен ка-йăксем килме тытăнаççĕ. Вĕсем хăйсемпе пĕрле грипа пуçарса яракан вируса та илсе килме пултараççĕ. Çавăнпа та çурхи вĕçев вăхăтĕнче ирĕкри кайăксемпе хутшăнасран кил хуçисен чăх-чĕпсемпе хур-кăвакалсене урама та, пĕвене те ямалла мар. Кайăк грипĕнчен сыхланма пирĕн районта профилактика ĕçĕсем ирттерессипе комплекслă плансем хатĕрленĕ. Çавна пула уйрăм хушма хуçалăхсенчи пур кайăк-кĕшĕке шута илнĕ. Енчен те чăх-чĕп кайăк-кĕшĕк грипĕпе чирленĕ пек пулнине асăрхасан, пĕр тăхтаса тăмасăр ветеринари специалисчĕсене пĕлтермелле. Çийĕнчех лаборатори тĕрĕслевĕ туса диагноз лартас пулать. Пĕр тăхтаса тăмасăр килкартине дезинфекцилемелле. Массăллă информаци хатĕрĕсенче кайăк-кĕшĕк грипне хирĕç вакцина туса кăларни çинчен çырнисене тĕл пулатăн. Пирĕн района 29 пин штук вакцина килмелле. Кĕçех вара вĕсемпе вакцинăлама пуçлĕç. Халĕ эпир усă куракан вакцина кайăк-кĕшĕк грипĕ ересрен çăлса хăвармассине пĕлсе тăратпăр пулсассăн та, сыхлăх мерине йышăнни пирĕн организм çирĕплĕхне ỹстерме пулăшни çинчен манмалла мар. Иммунитет çирĕпленчĕ-тĕк, нимĕнле вирус та çыншăн хăрушлăх кăларса тăратмĕ. Паллă ĕнтĕ, кайăк-кĕшĕк грипĕ сывлăш тата какай урлă ерме пултарать. Чирлĕ кайăк-кĕшĕкпе çыхăннă çыннăн унпа чирлес хăрушлăх палăрмаллах ỹсет. Витери сывлăша ăша сывласа илни те çителĕклĕ кун пек чухне. Кайăк-кĕшĕк грипĕ Раççей территорийĕнче те хуçаланма пуçланине шута илсе вăл пирĕн района çитес хурăшлăх та пур. Çавăнпа çак чир кунта çитесрен тата сарăласран ял тăрăхĕсен пуçлăхĕсен санитари мероприятийĕсем ирттерессине тимлемелле, выльăх-чĕрлĕх масарĕсене, çỹп-çап тăкмалли тата ытти вырăнсене йĕркене кĕртмеллине палăртрĕç канашлура.