Этем çăкăр-тăварпа çеç пурăнаймасть, ăна чун апачĕ те тăтăшах кирлĕ. Культура, искусство произведенийĕсем çынна тарăнрах шутлама, вăл е ку лару-тăру çине урăхларах куçпа пăхма е ĕç кунĕ хыççăн туллин канма май параççĕ. Пирĕн район центрĕнче культура мероприятийĕсем час-часах пулаççĕ. Халăха хамăрăн артистсем те, тĕп хуларан килекеннисем те пултарулăхĕпе савăнтараççĕ. Эстрада юрăçисем, халăх ансамблĕсем, театрсен коллективĕсем те манмаççĕ комсомольскисене, килсех тăраççĕ. Акă, иртнĕ эрнекун районти культурăпа кану центрне театр искусствине кăмăллакансем тĕрлĕ ялсенчен йышлăн пуçтарăнчĕç. Çав каç кунта К.В.Иванов ячĕллĕ Ĕçлĕх Хĕрлĕ Ялав орденлĕ Чăваш патшалăх академи театрĕн артисчĕсем сцена çине тухрĕç. Вĕсем В.Константиновăн "Ĕмĕр ĕмĕрле савнипе пĕрле" икĕ пайлă комедине кăтартрĕç. Пьесăн тĕп теми _ çамрăклăх, юрату. Ăçта çамрăксем, унта яланах кăсăклă ĕçсем сиксе тухаççĕ. Вар тытса кулмалли самантсем пит нумай пулчĕç. Спектакль куракансенчен пĕри те çав каç килтен тухса пынăшăн ỹкĕнмерĕ пуль тетĕп. Рольсенче ЧР тава тивĕçлĕ артисткисем Валентина Ситова, Василиса Петрова, Сергей Иванов, Николай Петров, Ольга Зубкова тата ытти актерсем вылярĕç. Пĕтĕм тĕнчери театр кунĕ умĕн район çыннисемшĕн чăн лайăх парне пулчĕ ку спектакль.