Иртнĕ эрнере район администрацийĕ çумĕнчи наркотиксене хирĕçле кĕрешекен комисси ларăвĕ иртрĕ. Комисси членĕсем пирваях Кайнлăк ял поселени пуçлăхне С.Н.Журавлева итлерĕç. Сергей Николаевич çамрăксем, шкул ачисем наркотиксемпе, ытти усал ĕçсемпе ан çыхланччăр тесе хăйсен территорийĕнче мĕнле ĕçсем тунине каласа пачĕ. Культура çурчĕсенче, шкулсенче профилактика тĕлĕшпе тĕрлĕ мероприятисем йĕркелеççĕ. Кунсăр пуçне, стендсем пур, куравсем те пулаççĕ. Çамрăксемпе ĕçлекен тĕп специалист Р.П.Суратова тата Л.И.Ярышева врач-нарколог Хирти Мăнтăр тата Йăлмахва шкулĕсенче вĕренекенсемпе йĕркеленĕ ыйтăм çинче чарăнса тăчĕç. Вĕсем ачасен право пĕлĕвĕ сахалраххине палăртрĕç, наркотикпа усă курнăшăн, ăна упранăшăн мĕнле яваплăх тыттарнине пĕлмеççĕ. Çавăнпа та шалти ĕçсен пайĕн, райадминистрацин, прокуратурăн çак енĕпе шкулсемпе тачă çыхăнура ĕçлемеллине çирĕплетрĕç. ШĔП сотрудникĕ С.А.Кокорев ял çыннисем пĕлсе е пĕлмесĕр мăкăнь ỹстерни пирки каларĕ. Акă, иртнĕ çулсенче Нĕркеç, Хырхĕрри ялĕсенче çакăн пек тĕслĕхсем тупса палăртнă. 2 çынна учета илнĕ. Ларăва вĕçлесе комисси председателĕ Н.Максимов решенипе паллаштарчĕ, çитес вăхăтра наркоманине хирĕçле тумалли ĕçсене палăртса хăварчĕ.