"Дружба" ял хуçалăх кооперативĕнче Афган тата Чечен вăрçисенче пуçĕсене хунă И.Гаврилов тата В.Тазетдинов ячĕпе мини-футбол ирттересси йăлана кĕнĕ. Кăçал вăл раштавăн 23-мĕшĕнче Хирти Явăш вăтам шкулĕн спорт площадкинче иртрĕ. Ку турнир кăçалхипе 14-мĕш хут пулчĕ. Уява паттăрсен ашшĕ-амăшĕсем, юлташĕсем, çывăх тăванĕсем, Чечен тата Афган вăрçи витĕр тухнă çамрăксем тата спорта юратакансем пухăнчĕç. Хăнасене чыслама ял хуçалăх управленийĕн начальникĕ Г.Киргизов, "Дружба" ял хуçалăх кооперативĕн председателĕ Р.Мансуров, Эльпуç ял поселенийĕн пуçлăхĕ Н.Носов, районти çар ĕç комиссарĕн ĕçне вăхăтлăх пурнăçлаканĕ С.Павлов тата ыттисем те килсе çитрĕç. Спортсменсене ăнăçу сунчĕç. Хĕрỹ вăйăра сакăр команда тупăшрĕ. Патăрьел районĕнчи треньелсемпе хуçасем 2-шер команда йĕркеленĕ. Унсăр пуçне елчĕксем, пирĕн районтан аслăчурачăксем, Аслă Çĕрпỹел тата Нĕркеç спортсменĕсем хутшăнма кăмăл турĕç. Çĕнтерỹçĕ ятне уяв хуçисем тивĕçлĕ пулчĕç. Иккĕмĕш-пе виççĕмĕш вырăнсене патăрьелсем пайларĕç. Парнесене тивĕçрĕç. Çак турнира ирттерме Ф.Асейнов, Х.Идиатуллин, Эльпуç ял поселенийĕ тата ыттисем те чылай пулăшнă. Асăннă спонсорсене тав сăмахĕ калас килет.