Пирĕн района республикăра чăннипех те çĕрулми районĕ теме пулать. Кунта республикăра туса илекен çĕрулмин 23 процентне çитĕнтереççĕ. "Слава" картофелю" агрофирма" ООО хăй çеç республика шайĕн 7,2 проценчĕ чухлĕ çĕрулми туса илнĕ. Мухтаннă пек пулать пулсан та, пирĕн районта "иккĕмĕш çăкăр" туса илмелли техникăпа пуянни республикăра урăх çук. Çĕрулми туса илмелли комплект "Слава картофелю" агрофирма ОООра 3, "Урожай" колхозра, "Рассвет", "Слава" "Заря" ял хуçалăх кооперативĕсенче, "Нива" агрофирма" ОООра пĕрер. Кăçал ăна татах та туянас текен хуçалăхсем пур. Хăшĕ-пĕри комплектăн уйрăм техникине çеç туянасшăн. Пĕтĕмĕшле ăна илме хаклă. Анчах та çак комплектпа çĕр ĕçне туни тухăçа палăрмаллах ỹстерет. Çакна иртнĕ, виçĕмçулхи кăтартусем те çирĕплетеççĕ. Хаклă техника хăйĕн хакне 1-2 çултах кăларать. Иртнĕ çулхи кăтартусене тишкерсе пăхар-ха. Енчен те 2005 çулта районти пĕрле-шỹллĕ хуçалăхсем 1558 гектар çинче "иккĕмĕш çăкăр" çитĕнтернĕ. Иртнĕ çул вара ăна 1684 гектар çинче туса илнĕ. Çакă çĕрулми паянхи кун тупăшлă уй-хир культури пулнине çирĕплетет. Сводкăранах куратăр ĕнтĕ, çĕрулми лаптăкĕн калăпăшĕ пысăк. Халĕ хуçалăхсем пурне те кĕркуннех васкаса сутса яма тăрăшмаççĕ. 8 пин тонна яхăн "иккĕмĕш çăкăра" упрама путвалсене, хранилищĕсене хунă. Хĕлле, çуркуннене хирĕç унăн хакĕ ỹсме пултарать. Çĕрĕç технологине пысăк шайра тытса пынипе пĕрлех сортсемпе те ĕçлеççĕ. Хăш сорт тухăçлăрах, ăна туянакансем пур-и, вăл мĕнле упранать? Çаксене йăлтах шута илеççĕ. Иртнĕ çул пирĕн районти пĕрлешỹллĕ хуçалăхсем "удача", "невский", "романо" сортсене ытларах лартса туса илнĕ. Çав вăхăтрах 5 хуçалăхра "ред-скарлет" сорта лартса ỹстернĕ. Акă, "Слава картофелю" агрофирмăра" апат-çимĕç валли çак сорта лартнă, кашни гектартан 600 центнер ытла тухăç илнĕ. Ку сортăн паха енĕсем: вăл вăтам вăхăтра пулса çитет, хуппи çутă, хĕрлĕ тĕслĕ. Кунсăр пуçне, иртерех кăларсан та вăл шывак мар. "Иккĕмĕш çакăр" паянхи кун чи тупăшлă культурăсенчен пĕри. Çавăнпа та пĕлсе, çĕнĕ технологипе усă курса ĕçлесен унран услам курма пулатех.