Çанталăк çуркунне çитнине кунсерен ытларах та ытларах систерсе пырать. Район халăхĕ те нумаях пулмасть çеç хĕле савăнăçлă лару-тăрура ăсатрĕ. Иртнĕ вырсарникун вара спортсменсем хĕллехи спорт сезонне хупрĕç, Аслă Чурачăкра "Каçал ен" хаçат парнисемшĕн йĕлтĕрпе ăмăртрĕç. Çак кунах СССР чемпионкин Вера Чернован призĕсене çĕнсе илес енĕ-пе те унтах тупăшу пулчĕ. Старта учительсем те тухрĕç. Вĕсем вĕрентỹ ĕçченĕсен профсоюз райкомĕн кубокне çĕнсе илессишĕн йĕлтĕр йĕрĕ çине тăчĕç. Çавăнпах пулĕ çак ăмăрту нумай-нумай спортсмена пуçтарчĕ. Спорта юратакансене тĕп судья А.В.Пундяков, "Каçал ен" хаçатăн тĕп редакторĕ Л.Г.Шуряшкина, "Труд" ял хуçалăх кооперативĕн председателĕ В.П.Николаев, Чĕчкен ял поселенийĕн пуçлăхĕ Ю.Г.Лукиянов саламласа ăнăçу сунчĕç. В.Чернован тăванĕ В.И.Крылова, чемпионкăпа пĕр класра вĕреннĕ В.В.Белков чаплă спортсменка пирки аса илчĕç, çамрăксене унран тĕслĕх илсе спортра чаплă çитĕнỹсем тума халалларĕç. Ăмăртусем пуçланчĕç. Çанталăк сивĕ мар. Куракансем, "чирлекенсем" нумай. Малтанах пĕтĕмĕшле пĕлỹ паракан тĕп шкулсенче вĕренекен ачасем старт илчĕç. Командăсенчи 2 хĕрача та 2 арçын ача 3 километрлă эстафетăлла дистанцире вăй виçрĕç. Пĕрремĕш тапхăртах хырхĕррисем мала тухрĕç, кайран та çитĕнĕве алран ямасăр финиша пуринчен хăвăртрах çитрĕç. Александровка пĕтĕмĕшле пĕлỹ паракан тĕп шкул команди дистанцие иккĕмĕш вĕçлерĕ. Чĕчкен тĕп шкул командинчи ачасем те япăх мар йĕлтĕрçĕсем пулнине çирĕплетсе пачĕç. Вĕсем - виççĕмĕш вырăнта. Вăтам шкулсенче вĕренекенсем хушшинчи тупăшу та çивĕч иртрĕ. Кашни командах мала тухассишĕн ăнтăлчĕ. Кунта вара Анат Тимĕрчкасси вăтам шкулĕн команди мала тухрĕ. Шурутсем - иккĕмĕш, Кĕçĕн Çĕрпỹел вăтам шкулĕнчен килнĕ спортсменсем виççĕмĕш вырăн йышăнчĕç. Предприятисен, организацисен, ял поселенийĕсен командисем йышлах пулмарĕç пулин те, кашниех çĕнтерỹшĕн тăрăшрĕ. Дистанцире Хырхĕрри ял поселенийĕн команди палăрчĕ. Шурут тата Чĕчкен ял поселенийĕсенчи спортсменсем 2-мĕш тата виççĕмĕш вырăнсене йышăнчĕç. Шкулта вĕрентекенсем, ĕçлекенсем чылайăн старта тăчĕç. Хырхĕрри пĕтĕмĕшле пĕлỹ паракан тĕп шкулĕн вĕрентекенĕсем чăннипех те спортпа туслине, йĕлтĕр спортне юратнине çирĕплетрĕç. Вĕрентỹ ĕçченĕсен профсоюз райкомĕн кубокне çĕнсе илчĕç. Шурут вăтам шкулĕнчи учительсен команди иккĕмĕш пулчĕ. Виççĕмĕш вырăна Комсомольски 1-мĕш вăтам шкулĕн туслă команди çĕнсе илчĕ. Ăмăртăва хупнă май çĕнтерỹçĕсене "Каçал ен" хаçатăн призĕсене тата Хисеп грамотисене Л.Г.Шуряшкина тĕп редактор пачĕ. Çавăн пекех А.В.Пундяков та мала тухнисене саламласа парнесемпе чысларĕ. Чĕчкен ял поселенийĕ малтанхи тапхăрта финиша пĕрремĕш çитнĕ командăсем валли ятарлă призсем хатĕрленĕ. Тивĕçлисене парнесем пачĕç. Вĕрентỹ ĕçченĕ-сен профсоюз райкомĕн председателĕ А.А.Яковлев çĕнтерỹçĕ командăна кубок, призерсене парнесем пачĕ. Аслă Чурачăк вăтам шкулĕ спортсменсене хапăл туса кĕтсе илчĕ, условисем туса пачĕ, вĕри апат çитерчĕ.