Паспортпа виза службин уйрăмне куллен вуншар çын килет. Кам пуçласа çак документа илет, кам 20 е 45 тултарнă хыççăн çĕннипе улăштарасшăн. Кунсăр пуçне тĕрлĕ сăлтавсене пула çак документа çухатать. Юлашки çулсенче ют çĕршыва каякансем те йышланчĕç. Акă, кăçал ют çĕршыва каймалли паспорт ыйтса пирĕн пата 29 заявка панă. Паспорт - çыннăн тĕп докуменчĕ. Çавăнпа та унпа саккуна пăсса усă курма юрамасть. Енчен те эсир 20 е 45 çул тултартăр пулсан пĕр уйăхран кая юлмасăр çĕнĕ паспорт тутармалла. Çакă качча кайса урăх хушамат илнисене те пырса тивет. Асăннă вăхăтран кая юлсан 1500-2500 тенкĕ таран штраф пама ирĕк пур. Кăçал районти паспортпа виза служби 432 çынна паспорт панă. Илекенсем татах та пур. Вĕсене эпир йышăнма хатĕр. Анчах та пирĕн службăн ĕç вăхăчĕ Халĕ улшăннă. Тунтикун, юнкун, эрнекун эпир граждансене 14 сехетрен пуçласа 20 сехетчен, ытларикунпа кĕçнерникун 10 сехетрен пуçласа 15 сехетчен, шăматкун 10 сехетрен пуçласа 14 сехетчен йышăнатпăр. Канмалли кунсем графикпа черетленсе пыраççĕ: уйăхăн 1, 3, 5 эрнисенче - шăматкунпа вырсарникун, 2, 4 эрнисенче вырсарникунпа тунтикун пулаççĕ. Çак графика эпир вырăнта çирĕплетмен, миграци службин республикăри управленийĕн хушăвне пăхăнатпăр.