Район çыннисене вăхăтра йышăнса вĕсен ыйтăвĕсене хурав парасси - кашни организаци тивĕçĕ. Çавна май вĕсемпе хăтлă та пысăк пỹлĕмсенче калаçнине мĕн çиттĕр? Организацисем клиентсемпе ĕçлеме çăмăлрах пултăр тесе чылай тăрăшаççĕ. Акă, март уйăхĕн 21-мĕшĕнче РФ Пенси фончĕн управленийĕн районти уйрăмĕн çуртне официаллă йĕркепе уçрĕç. Çак савăнăçлă саманта пирĕнпе пайлама ЧР культура, национальноçсен ĕçĕсен, информаци политикин, архив ĕçĕсен министрĕ П.С.Краснов, РФ Пенси фончĕн Чăваш Республикинчи управленийĕн управляющийĕ Р.А.Кондратьева, "Чăвашрегионгаз" предприятин генеральнăй директорĕ, ЧР Патшалăх Канашĕн депутачĕ К.С.Мифтахутдинов та килнĕ. Петр Краснов хăйĕн саламлă сăмахĕнче Чăваш Енти, çав шутра Пенси фончĕн уйрăмĕнчи ĕçченсен ĕçне пысăка хурса хакланине, район çыннисемшĕн калама çук пулăшу пулнине каларĕ. Роза Алексеевна Пенси фончĕн ĕçĕнче нумай çĕнĕлĕх пулнине палăртрĕ. Халĕ унта клиентсемпе ĕçлеме пĕтĕм услови пуррине савăнса пĕлтерчĕ. Район пуçлăхĕ Г.Волков та пенси фончĕн ĕçченĕсене саламларĕ, ĕçре ăнăçу сунчĕ. Юсаса çĕнетнĕ çурта кĕнĕ çĕре çыхнă хĕрлĕ хăйăва сумлă хăнасене - П.Краснова, Р.Кондратьевăна, К.Мифтахутдинова, Г.Волкова - касма шанчĕç. Çурта кĕнĕ хыççăн тĕлĕнмелли пайтах пулчĕ. Пĕрремĕш хутри фойере клиентсемпе ĕçлеме ятарлă 3 кабинет пур. Унта çынсене кăсăклантаракан ыйтусем çине специалистсем тулли хурав параççĕ тата клиентсем цифрăсемпе компьютер çинче паллашма пултараççĕ. Ку вара питĕ меллĕ. П.С.Краснов пĕрремĕш клиент пулса пенси фончĕн ĕçченĕсен ĕçĕпе паллашрĕ, компьютер умне ларчĕ. Фойерех тĕрлĕ стендсем пур. Кунта хăвна кăсăклантаракан ыйтусен хуравне те тупма пулать. Хăнасем пĕрремĕшпе иккĕмĕш хутри кашни кабинетрах пулчĕç. Кабинетсенче ĕçлеме пĕтĕм услови пур. Савăнса ĕçле те ĕçле, тăван республика, район аталанăвĕшĕн тăрăш. Савăнăçлă уявра районти 5 хĕрарăм амăш капиталĕн сертификатне илчĕç. Вĕсем - 2007 çулта чи малтан заявлени паракансем. Раççей Федерацйĕн саккунĕпе килĕшỹллĕн, 250 пин тенкĕне илме тивĕçлисене савăнăçлă лару-тăрура саламларĕç. Сертификатăн пĕрремĕш хуçисем - Ильсия Гайнутдинова (Урмаел), Любовь Ятманова (Вăрманхĕрри Чурачăк), Гульмира Фаряхова (Эльпуç), Айсылу Сейфуллова (Эльпуç), Гузелия Садртдинова (Тукай Мишер). Вĕсене Г.Волков, З.Каринкина, Л.Кондратьева, П.Краснов чĕререн саламласа çирĕп сывлăх, телей, çемьере ăнлану, юрату сунчĕç. К.Мифтахутдинов пурне те "Газпром" парнипе савăнтарчĕ. Пултаруллă та ăста строительсене Хисеп грамотисемпе парне парса чысларĕç. Çак çурта уçни район çыннисемшĕн тата Пенси фончĕн ĕçченĕсемшĕн чăннипех те пысăк уяв пулчĕ.