Мартăн 21-мĕшĕнче районта ял хуçалăх потребитель кооперативĕсенче ĕçлекенсен семинар-канашлăвĕ иртрĕ. Унта ЧР Ял хуçалăх министерствин аграри аталанăвĕн тата пурлăх хутшăнăвĕн сектор заведующийĕ И.Н.Вовкушевский, ЧР "Агро-Инноваци" ПУП директорĕ Н.И.Васильев, Комсомольски, Патăрьел, Шăмăршă тата Елчĕк районĕсен администраци представителĕсем, потребитель кооперативĕсен руководителĕсем хутшăнчĕç. Паянхи куна район территорийĕнче ял хуçалăх потребителĕсен 6 кооперативĕ ĕçлет. План тăрăх, çитес вăхăтра татах та уçăлмалла. Семинар-канашлу "НУР" ял хуçалăх потребителĕсен кооперативĕнчен пуçланчĕ. Асăннă кооператива З.Ш.Заргиров ертсе пырать. "НУР" -  районта ăнăçлă ĕçлесе пыракан кооператив. Унта сĕте тасатса ытти организацисене сутаççĕ. Кунне вĕсем 25-28 тонна сĕт тасатаççĕ. Ăна Çĕмĕрле хулипе Ульяновск облаçне турттараççĕ. Сĕте мĕнле тасатнине семинара хутшăнакансем хăйсен куçĕсемпе курса ĕненме пултарчĕç. Малалла семинар-канашлу район администрацийĕн ларусем ирттермелли пысăк залĕнче тăсăлчĕ. Чи малтанах ял хуçалăх пайĕн начальникĕ Георгий Киргизов районта потребительсен кооперативĕсене мĕнле туса хуни çинчен каласа пачĕ. Республикăри ял хуçалăх потребителĕсен кооперативĕн организацийĕсем çинче Ял хуçалăх министерствин аграри аталанăвĕн тата пурлăх хутшăнăвĕн сектор заведующийĕ Игорь Вовкушевский чарăнса тăчĕ. Чăваш Республикин "Агро-Инноваци" ПУП директорĕ Николай Васильев сĕт тасатмалли лабораторийĕпе тата компьютер оборудованийĕпе паллаштарчĕ. Итлекенсем вĕсене чылай ыйту пачĕç, тулли хуравсем илчĕç. Çавăн пекех "ТАН" кредит кооперативĕн тĕп бухгалтерĕ Равиль Калаков та сăмах илчĕ. Вăл асăннă кооператив çинчен кĕскен каласа пачĕ.