Мартăн 27-мĕшĕнче Шупашкар хулинчи ача-пăча творчествин çуртĕнче республикăри ачасен художествăлла пултарулăх конкурсĕн финалĕ пулнă. Ăна "Ачалăх адресĕ - Раççей" VII фестивале халалласа йĕркеленĕ. Фестивале Чăваш Республикинчи ача-пăча коллективĕсен, уйрăм юрăçсен ăсталăхне ỹстерес, пĕр-пĕринпе ытларах хутшăнас тĕллевпе йĕркеленĕ. Район чысне Нĕркеç вăтам шкулĕн вĕренекенĕ Сергей Петров хỹтĕленĕ. Вăл "Музыка" номинацинче тупăшнă. Конкурс условийĕсемпе килĕшỹллĕн, çамрăк юрăçсен икĕ тĕрлĕ характерлă юрă шăрантармалла пулнă. Кунсăр пуçне, пĕр юрри районăн визитлă карточки пулмалла. Сергей "Панулмисем", "Аист на крыше" юрăсене юрланă. Хăйĕн юрăç ăсталăхĕпе жюрисене тĕлĕнтернĕ. Конкурс пĕтĕмлетĕвĕсемпе вăл иккĕмĕш вырăна тухса, "Ника" статуэткăна çĕнсе илнĕ.