Пĕтĕм тĕнчери театр кунне халалласа районти халăх театрĕ сцена çине кашни çулах çĕнĕ спектакль кăларать. Кăçал вара Николай Сидоровăн "Пуçа килсен пуçана" пьесине суйласа илнĕ. Валентина Краснова режиссер ертсе пынипе спектакле тĕплĕн хатĕрленнĕ. Мартăн 27-мĕшĕнче районти культура çуртĕнчи премьерăна халăх йышлă пухăнчĕ. Артистсем чăн пурнăçри пек ĕнентермелле, питĕ ăста вылярĕç. Пьесăри тĕп тема тĕнче пекех ватă, вăл -юрату. Кулянтарать, савăнтарать, çапăçтарать те çураçтарать çак туйăм. Альбинăпа Виктор Кокшинсем (Шурккапа Иван), Валентина Курицынăпа Владимир Павлов (Машăпа Паша) мăшăрсен ролĕсене аван вылярĕç. Варвари сăнарне вара шăпах Лариса Носова валли калăпланă тейĕн. Савнă каччи улталаса хăварнăшăн хурланса куççуль юхтаракан Ирина ролĕнчи Марина Волковăна ĕненмесĕр тăма çук. Николай Зайцевпа (Павлуш) Татьяна Козина (почтальонка Верук) тинех пĕр-пĕрин юратăвне ĕненсе пĕрле пулнăшăн кашни кураканах савăнчĕ пуль тетĕп. Комсомольскинчи халăх театрĕ йĕркеленсе кайнăранпа кăçал вăтăр сакăр çул çитет. Çак кĕске мар тапхăрта çĕршер артист улшăннă, вуншар пьесăна сцена çине кăларнă, çĕр-çĕр яла çитсе куракансене савăнтарнă. Çапах театр коллективĕ яланах хăйĕн тĕп тĕллевне асра тытса район халăхне кашнинчех çĕнĕ постановкăсемпе паллаштарать, ăсталăхне ỹстерсе пырать. Малашне те вырăнти артистсене çитĕнỹсем тумă ăнăçу сунатпăр.