Иртнĕ ĕмĕрĕн 30-мĕш çулĕсен пуçаламăшĕнче çуралнă колхозсен юхăмĕ хăйĕн историйĕнче темле улшăну та тỹссе ирттерчĕ. Вĕсен ячĕсем пĕрре мар улшăнчĕç. Акă, хамăр районта та ял хуçалăх предпияти-йĕсенчен ытларахăшĕ халь "кооператив" ятпа çỹрет. Пурнăç малалла шунă май татах çĕнĕ улшăнусем илсе килет. Акă, кăçалхи январĕн 27-мĕшĕнче малтан кооператив пулнă "Слава" хуçалăх организаци формине ылмаштарса "ООО" регистрациленĕ. Çакă Луцки, Александровка ялĕсенче пурăнакан пенсионерсене, ял хуçалăх ĕçне хутшăнман çынсене те хумхантарать, унăн малашлăхĕ пирки шухăшлаттарать. Çавăнпа инциативлă ушкăн хăйĕн кăмăлсăрлăхне палăртса район судне тавăç тăратнă (суд ларăвĕ апрелĕн 5-мĕшĕнче). Апрелĕн 3-мĕшĕнче ял çыннисемпе çак ыйтупа Чăваш Республикин юстици министрĕн çумĕ Михаил Кузьмин, район пуçлăхĕпе Геннадий Волковпа район депутачĕсен Пухăвĕн председателĕ Евгений Карпеев тĕл пулнă. Вĕсем пухăннисен ыйтăвĕсем çине хуравланă.