Раççей шкулĕсенче ĕçлекен учительсем уроксенче тĕрлĕ меслетсемпе мелсем усă кураççĕ. Анчах вĕсен ĕç опытне пĕтĕм çĕршыври учительсен умĕнче кăтартса пама нумай чухне майĕ çукрах. 1988 çулта "Физика в школе" журналта ĕçлекенсем хамăр çĕршыври физикăна вĕрентекенсем патне çырупа тухнă. Унта шкулта ĕçлекенсене хумхантаракан ыйту нумай пулнă. Учительсен тĕрлĕ шухăшне шута илсе физика урокĕсен методикăлла фестивальне ирттерме шутланă. Пĕтĕм Союзри пĕрремĕш фестивале 1989 çулхи март уйăхĕнче Мускав облаçĕнчи Черноголовка посело-кĕнче йĕркеленĕ. Унта нумай регионти физика учителĕсем пуçтарăннă. Кунсăр пуçне, физика учителĕсем усă куракан ĕç опытне пĕтĕмлетсе пуçтарнă кĕнеке кăларнă. Çакăн хыççăн çĕршыври тĕрлĕ регионсенче физика урокĕн фестивалĕсене ирттерме тытăннă. Чăваш Республикинчи пĕрремĕш физика фестивальне 1990 çулхи çуркунне Шупашкар хулинче йĕркеленĕ. Унтанпа вăхăт самаях иртрĕ ĕнтĕ. Районти физика урокĕсен фестивалĕсем 1995 çултанпа пыраççĕ. Физика учителĕсем хыççăн ытти предметсемпе те фестивальсем йĕркелеме пуçларĕç. 1996 çулта Патăрьелĕнче иртнĕ çиччĕмĕш фестивальте математика учителĕсем те пулчĕç. Республикăри фестивальсенче пирĕн районти физика учителĕсем те хутшăнаççĕ, тĕрлĕ номинацире çĕнтерỹçĕ дипломĕсемпе таврăнаççĕ. Уйрăмах В.Н.Петров (Комсомольски 1-мĕш вăтам шкулĕ), В.Ф.Григорьев (Хирти Явăш вăтам шкулĕ), И.И.Евграфова (Кĕçĕн Çĕрпỹел вăтам шкулĕ), Г.Н.Петров (Хырхĕрри тĕп шкулĕ). Республикăри 18-мĕш фестивальте (вăл Шупашкар хулинчи тăватă шкулта иртрĕ) физика, математика, информатика предмечĕсене вĕрентекен 140 яхăн учитель хутшăннă. Çак фестиваль вăхăтĕнче 52 урок иртнĕ. Пирĕн районтан виçĕ физик, пĕр математик хутшăнчĕç. Г.Н.Петров (физика учителĕ) Р.Н.Алексеева (математика учителĕ) фестивальте тĕрлĕ номинацире çĕнтерсе дипломсем илме тивĕçрĕç. Вĕсем иккĕшĕ те Хырхĕрри тĕп шкулĕнче ĕçлеççĕ. Раиса Николаевна Республикăри фестивальте малтанхи хут анчах-ха, çапах та ун урокĕсене пысăк хак пачĕç. Мĕнпе уйрăлса тăрать-ха кăçалхи физикăпа математика урокĕсен республикăри фестивалĕ? Малтанах, учительсем презентаци урокĕсем ирттерчĕç. Кунсăр пуçне, хăнана килнĕ физикăпа математика учителĕсен урокĕсем пулчĕç. Уроксен кăçалхи уйрăмлăхĕ - учительсем компьютерпа, мультимедиллĕ проекторсемпе анлă усă курни. Уроксенче проект меслечĕсемпе ачасен пултарулăхне кура тĕрлĕ йывăрăшлă ĕçсем усă курни вырăн тупрĕç. Уроксемсĕр пуçне, учительсем хăйсем усă куракан çĕнĕлĕхсен, меслетсен презентацийĕсене ирттерчĕç. Çитес çулхи фестивале Çĕмĕрле районĕнче ирттерме шутларĕç. Унта физикăпа математика учителĕсемсĕр пуçне химипе биологие вĕрентекенсене те чĕнме йышăнчĕç. Районта физика, математика, хими, биологи предмечĕсене вĕрентекен пултаруллă учительсем нумай. Вĕсем хăйсен ăсталăхне республика учителĕсем умĕнче кăтартма пултараççех.