Выльăх-чĕрлĕх отраслĕнчи лару-тăру, кирек хăш производствăри пекех, специалистсен пултарулăхĕнчен, ертỹçĕсем ĕçе мĕнле йĕркеленинчен килет. Çакна "Дубовка" тулли мар яваплă общество (ООО тетпĕр) тĕслĕхĕнчен те курма пулать. Вунă çул каялла "Комсомоль-ское" предприяти пулнă вăхăтра дубовкăсем районта çеç мар, республикăра та палăрса тăнă. Сăвăм пысăк, апат çителĕклĕ, ĕçченсем хастар. Çакă вĕсене çитĕнỹллĕ ĕçлеме май панă та. Анчах та çĕн йĕркелỹ, рынок экономики пуçланнă, "Комсомольское" предприяти саланма тытăннă тапхăрта ку ферма çулсерен япăхланса пычĕ. Витесем юхăнчĕç, ĕнесен продуктивлăхĕ чакрĕ. Йывăр вăхăтра хăй аллине илчĕ пĕр предприниматель çак фермăна. Чи малтанах территоринче йĕрке тутарчĕ, юсав ĕçĕсем ирттерчĕ. Выльăхсен ăратлăхне ỹстерес енĕпе ĕçлеме пуçларĕ. Унăн тăрăшулăхне кура специалистсем те, ферма ĕçченĕсем те алă усса лармарĕç. Юмахра çеç вăл çĕтĕк пỹртрен тỹрех кермен пулать. Юхăннă фермăра йĕрке тăвасси пĕр кунта пулман, паллах. Сăмахăм ятарласа Дубовка фермине, унти коллектива мухтас енĕпе пымасть. Çак кунсенче унта машинăпа сĕт сăвакан операторсемпе выльăхсене искусствăлла майпа пĕтĕлентерес енĕпе ĕçлекен техник-осеменаторсен районти конкурсĕ иртрĕ. Унта хутшăнакансем, яланхи пекех, чи малтан лару-тăрăва хак пачĕç. Чылайăшĕ "Дубовка ферми халĕ те пур-ши тесе тĕлĕнтĕмĕр", тесе пĕр пытармасăр палăртрĕç. Унти йĕркелĕхрен, тасалăхран тĕлĕнчĕç те пулĕ. Ара, "Дубовка" ООО районта аталанакан хуçалăх çеç шутланать. Апла пулин те кунти ĕнесем сĕтлĕ, кашни ĕне пуçне шутласа сăвăм енĕпе районта 4-5-мĕш вырăнсенче. Кунта пурĕ 200 пуçа яхăн мăйракаллă шултра выльăх, вăл шутран 90 пуç ĕне. Кунсăр пуçне 60 ытла пуç сурăх тытаççĕ. Выльăхсем пурте кĕтỹре. Кадрсем енĕпе çителĕклĕ. Территори тăрăх çỹренĕ май никамран та ку ферма пирки хурласа калаçнине илтмерĕм. Конкурса район администрацийĕн ял хуçалăх пайĕн тĕп зоотехникĕ К.Г.Гимальдинов уçрĕ. Иртнĕ çулхи çĕнтерỹçĕсем Чăваш Республикин патшалăх гимнĕ янранă вăхăтра ăмăрту ялавне çĕклерĕç. Тупăшăва тухакансене район пуçлăхĕн çумĕ, ял хуçалăх пайĕн начальникĕ Г.М.Киргизов, "Дубовка" ООО ертỹçи Г.М.Долгов саламларĕç, пурне те конкурсра çĕнтерỹ тума ăнăçу сунчĕç. "Пирĕн районти выльăх-чĕрлĕх пăхакансем кашни ĕнерен сĕт суса илес енĕпе пĕлтĕр Етĕрне районĕнчен пăртак çеç кая юлчĕç. Кăçал вара çулталăк пуçланнăранпах пĕрремĕш вырăнта пыратпăр. Малашне те ăна алăран вĕçертер мар. Çакă сиртен, ферма ĕçченĕсен маттурлăхĕнчен нумай килет",- терĕ Георгий Михайлович. Кăçалхи конкурса 7 хуçалăхри дояркăсем, 6 хуçалăхри техник-осеменаторсем килнĕ. Чи малтанах дояркăсен сĕт сумалли аппаратсене вăхăтпа салатса пуçтармалла, çав вăхăтрах çак ĕçе тĕрĕс тата пахалăхлă пурнăçламалла. Хăш доярка аппарата 5 минут иртсенех жюри умне тăратрĕ, хăшĕн вара... Тепĕр тĕрĕслев - ĕне сума ха-тĕрленесси, сăвасси, ун хыççăнхи ĕçсене санитарипе гигиена енчен тĕрĕс тăвасси. Ку енĕпе те кашниех хăйĕн пĕлĕвне кăтартрĕ. Теориллĕ ыйтусем те пулчĕç конкурсра. Дояркăсем вĕсем çине çăмăллăнах хуравлама пултарчĕç. Техник-осеменаторсен те хăй вăхăтĕнче илнĕ пĕлĕве çирĕп тĕрĕслекен жюрине кăтартса пама тиврĕ. Практикăра хăйсен ĕçне лайăх пĕлеççĕ пулсан та теори вăхăтĕнче çухалса каякансем те пулчĕç. Конкурс конкурсах çав, кам çаврăнăçуллăрах, хăйĕн пĕлĕвне кăтартма пултарать - çав çĕнтерет. Ăмăрту пĕтĕмлетĕвĕсене те палăртма вăхăт. Жюри машинăпа сĕт сăвакан операторсен ăмăрту вăхăтĕнчи ăсталăхне палăртнипе пĕрлех вĕсен производствăри кăтартăвĕсене те шута илчĕ. Вăл е ку доярка иртнĕ çул, кăçалхи 4 уйăхра кашни ĕнерен мĕн чухлĕ сĕт сунă тата ытти те. Техник-осеменаторсем енĕпе те çавăн евĕрлех пулчĕ. 100 ĕне пуçне мĕн чухлĕ пăру илнĕ, кĕтỹ йышĕ мĕнле... Машинăпа сĕт сăвакан операторсен конкурсĕнче пĕлтĕрхи çĕнте-рỹçĕ, "Восток" ял хуçалăх кооперативĕн доярки Марина Белкова чи нумай балл пухнă. Иккĕмĕш вырăна "Искра" хуçалăхра тăрăшса ĕçлекен Инна Лебедева тивĕçрĕ. "Урожай" колхозран килнĕ Татьяна Еремеева виççĕмĕш вырăн йышăнчĕ. Паллах, конкурсра пĕрремĕш çул çеç хутшăнакансем те пулчĕç. Вĕсен аслă- раххисенчен вĕренмелли чылай-ха. Техник-осеменаторсенчен "чи лайăххи" ята Сергей Катиков тивĕçрĕ. Вăл "Восток" колхозран. Çамрăк-ха. Малашлăхĕ пысăк. "Заря" хуçалăхри П.Зверев иккĕмĕш вырăн йышăнчĕ. "Труд" ял хуçалăх кооперативĕнчи Е.Наумова хальхинче виççĕмĕш вырăна тухрĕ. Çĕнтерỹçĕсен июнĕн 7-8-мĕшĕсенче Пăрачкав районĕнче иртекен республикăри конкурсра район чысне хỹтĕ-леме тивет. Вĕсене пирĕн ăнăçу çеç сунмалла. Унта мала тухма дояркăсен те, техник-осеменаторсен те майсем пур. Вĕсен пултарулăхĕ те, пĕлĕвĕ те, ăсталăхĕ те, ĕç опычĕ те çителĕклех.