РФ Пенси фончĕн районти управленийĕнче тăрăшуллă, ăста специалистсем ĕçлеççĕ. Социаллă ĕçченĕн кунĕ умĕн вĕсенчен чи пултаруллисем наградăсене тивĕçрĕç. Пенси шайне палăртас, çĕнĕрен шутласа парас, тÿлес тата страхланă çынсен пенси прависене хаклас енĕпе ĕçлекен уйрăмăн специалистне Любовь Варсанофьевна Шашкинана «РФ Пенси фончĕн отличникĕ» паллăпа наградăларĕç. Персонификациленĕ учет, страховани тÿлевĕсем, парăмсене шыраса илесси енĕпе ĕçлекен уйрăмăн тĕп специалист-эксперчĕ Ирина Анатольевна Гришина Пенси фончĕн Чăваш Енри уйрăмĕн Хисеп грамотине, автоматизаци енĕпе ĕçлекен аслă специалист Владимир Витальевич Митюков профсоюзăн республикăри комитечĕн Хисеп грамотине тивĕçрĕç.

«РФ Пенси фончĕн отличникĕ» палла чи тăрăшуллисене, хастаррисене, çитĕнÿ хыççăн çитĕнÿ тăвакансене çеç параççĕ. Çак чыса Пенси фончĕн районти управленийĕн специалисчĕ те тивĕçни, паллах, питĕ савăнтаракан пулăм. Хаçат вулаканĕсене пултаруллă ĕçченпе çывăхрах паллаштарар-ха.

Л.Шашкина Васильевка ялĕнче çуралса ÿснĕ. Вăтам пĕлÿ илнĕ хыççăн пĕр хушă Шупашкарти пир-авăр комбинатĕнче вăй хунă. Унтан тăван района таврăнса патшалăх страховани инспекцийĕнче ĕçлеме пикеннĕ. Пурăна-киле Любовь Варсанофьевна пĕлĕвне анлăлатма шутланă, Канашри финанс техникумĕнче ăс пухнă. 1989 çулта тăрăшуллă çамрăка социаллă хÿтлĕх пайĕнче пенсисене палăртакан специалистра ĕçлеме сĕннĕ. Çапла вара вăл пенси тытăмĕнче вăй хума пикеннĕ.

Паянхи кун Любовь Варсанофьевна пенси шайне палăртас, çĕнĕрен шутласа парас, тÿлес тата страхланă çынсен пенси прависене хаклас енĕпе ĕçлекен уйрăмăн специалистĕнче тимлет. Кашни кунах вун-вун çынна йышăнма, пенсисемпе çыхăннă тĕрлĕ ыйтусене татса пама тивет унăн. Пуринпе те кăмăллăн пупленĕшĕн, тĕплĕн ăнлантарса панăшăн хисеплеççĕ ăна район çыннисем. «Кунĕпе çын хушшинче ĕçлекенсем майĕпен психолога тухса пынăн туйăнаççĕ. Эпĕ те хăш-пĕр çыннăн характерне алăкран кĕрсенех уйăрса илетĕп. Пирĕн ĕçре кашнинпе пĕр чĕлхе тупма пĕлни пĕлтерĕшлĕ. Кун пек чух кăмăла пăсакан самантсем пулмаççĕ», — паллаштарчĕ професси вăрттăнлăхĕсемпе Л.В.Шашкина.

Çынсене йышăннипе çеç мар, хут ĕçне те чылай тума тивет тăрăшуллă специалистăн. Енчен те хутсемпе ĕçленĕ чухне тимлĕхе çухатсан, вĕсене каялла ярса параççĕ, тепĕр хут тумалла пулса тухать. Çавăнпа та Любовь Варсанофьевна кашни документах тĕплĕн хатĕрлеме тăрăшать.

Нумай çул çак тытăмра ĕçлекенскер, кунти кăткăслăхсене вĕренсе çитнĕ ĕнтĕ. Хăйĕн пуян опычĕпе çамрăксене те паллаштарать вăл, вĕсене пулăшса пырать. «Ĕçлеме пуçланăранпа миçе специалиста вĕрентмен-ши эпĕ; Тин ĕçе пуçăнакансене аслисем вĕрентсе пымасан йывăр пуласси каламасăрах паллă. Çавăнпа та хам хыççăн килекенсене май килнĕ таран пулăшу кÿме тăрăшатăп», — пĕлтерет хастар та пултаруллăскер.

Коллективра туслăх пулмасан çитĕнÿсем çинчен калаçмалли те çук. Пенси фончĕн управлени-йĕнче ĕçлекенсем вара пĕр çемьери пек пурăнаççĕ. «Коллективра ытларах çамрăксем пирĕн. Вĕсем мана пĕрре те хăйсенчен хăвармаççĕ, ĕçре хавхалантарса пыраççĕ, ватăлма памаççĕ. Пурнăç таппинчен юласшăн мар-ха эпĕ: професси шайне ÿстерме, çĕнĕ технологисене алла илме тăрăшатăп. Туслă коллективра ĕçлес кăмăл пысăк», — тет Любовь Варсанофьевна.

Апрелĕн 1-мĕшĕ тĕлне пирĕн районти пенсионерсен шучĕ 7904 çынпа танлашнă, вĕсенчен 7195-шĕ — ĕç пенсийĕ, 797-шĕ патшалăх пенсийĕ илеççĕ. 3 çын Россия Федерацийĕ умĕнчи уйрăмах пĕлтерĕшлĕ ĕçĕсемшĕн хушма материаллă пулăшу илсе тăраççĕ, çав шутра 1 Социализмла ĕç Геройĕ тата Ленин орденне тивĕçнĕ 2 çын.

Пенсисене тата ытти социаллă тÿлевсене валли кăçалхи январь — март уйăхĕсенче 145918165 тенкĕ тăкакланă.

Пенси шайне ÿстерес тĕллевпе ирттернĕ мероприятисене пула пенсин вăтам шайĕ 8111 тенкĕпе танлашнă. Ватлăхпа паракан ĕç пенсийĕн вăтам шайĕ — 8432 тенкĕ. Федераллă социаллă хушма пулăшусем илсе тăракансен шучĕ чакнă. Апрелĕн 1-мĕшĕ тĕлне çакăн пеккисем 532-ĕн пулнă, тÿлев вăтамран — 991 тенкĕ.

5210 çын (65,9 процент) пенси укçине почта çыхăнăвĕн уйрăмĕсем урлă, 2694-шĕ (34,1 процент) ОСБ кредит организацийĕ тата Раççей ял хуçалăх банкĕ урлă илсе тăрать.

Н.КАЛАШНИКОВА.