Июнĕн 24-мĕшĕнче Чăваш Ен Пуçлăхĕ Михаил Игнатьев Республика кунне халалласа ирттернĕ Шупашкарти мероприятисене хутшăннă. Пĕтĕм чăвашсен «Акатуй» уявĕнче хăнасене çăкăр-тăварпа кĕтсе илнĕ. Республика Пуçлăхĕ, РФ Патшалăх Думин вĕренÿ енĕпе ĕçлекен комитечĕн председателĕн çумĕ Алена Аршинова, ЧР культура, национальноçсен тата архив ĕçĕсен министрĕ Вадим Ефимов тата Шупашкар хула пуçлăхĕ Леонид Черкесов Этнояла çитсе курнă, республикăн районĕсемпе хулисен этнокультурăлла кил картишĕсемпе паллашнă.

«Чăваш халăхĕн ăс-хакăл пуянлăхне пирĕн малалла та ăруран ăрăва парса пымалла, аталантармалла. Çак никĕсе çухатса пĕтермелле мар», — тенĕ М.Игнатьев хăйĕн

саламлă сăмахĕнче.

Çавăн пекех çак кун Пĕтĕм Раççейри халăх пултарулăхĕн «Раççей çăл куçĕсем» XXI фестивальне пĕтĕмлетнĕ, Пĕтĕм Раççейри декораципе хушма искусство енĕпе йĕркелекен «Руç ăстисем» XI конкурсăн çĕнтерÿçине саламланă. Республика Пуçлăхĕн аллинчен хаклă парнене илмелли чыса Иваново облаçĕнчи Палех поселокĕнче пурăнакан Лидия Колыгина тивĕçнĕ. Вăл конкурса Раççейри халăхсен кĕлеткисемпе тата пурнăç йывăççипе илемлетнĕ декораци вази тăратнă. Ăстасен конкурсĕн çĕнтерÿçи пĕлтернĕ тăрăх, Палех юмахсен тăван çĕр-шывĕ шутланать. Чăваш Республикин тĕп хулине килсе курса Лидия Колыгина Шупашкар та юмахсен тăван çĕр-шывĕ пулнине курса ĕненнĕ. Вăл хăйĕн конкурс ĕçне асăнмалăх Михаил Игнатьева парнеленĕ.

РФ Патшалăх Думин вĕренÿ енĕпе ĕçлекен комитечĕн председателĕн çумĕ Алена Аршинова республика çыннисене уяв ячĕпе саламланă, Чăваш Ен ĕçчен те пултаруллă çынсемпе пуян пулнине палăртнă.

Республика кунне халалланă уяв мероприятийĕсем Пĕтĕм Раççейри халăх пултарулăхĕн «Раççей çăл куçĕсем» XXI фестивалĕн гала-концерчĕпе, Санкт-Петербургри «Кăлтăрмач» ансамбль хутшăннипе йĕркеленĕ фольк-дискотекăпа тата Пĕтĕм тĕнчери фейерверксен фестивальне хутшăнакансем хатĕрленĕ гала-представленипе вĕçленнĕ.

Июнĕн 24-мĕшĕнче Тăвай районĕнче те Республика кунне уявланă. Çак кун Чăваш Ен Пуçлăхĕ Михаил Игнатьев «Фирма «Акконд-агро» АХОн пăру витине уçнă çĕре хутшăннă. Организаци директорĕ Вячеслав Иванов пĕлтернĕ тăрăх, агрофирма пăру витине, ĕнесен 2 витине тата сĕт цехне «АПК аталанăвĕ» приоритетлă наци проекчĕпе килĕшÿллĕн туса хунă. Çакна валли 219,6 миллион тенкĕлĕх инвестиципе усă курнă. Çĕнĕ производствăна уçнă май Чăваш Ен Пуçлăхĕ ĕçченсене ăнăçу суннă, паянхи экономика условийĕсем хресченсене çĕнĕлле ĕçлеме хистенине палăртнă. Хăнасем выльăх-чĕрлĕх комплексĕн территорине пăхса тухнă, çамрăк пăрусен пурăнмалли условийĕсемпе паллашнă.

Çавăн пекех çак кун «Чăвашсетьгаз» акционерсен уçă обществин Канашри филиалĕн Тăвайри газ участокне савăнăçлă лару-тăрура уçнă. Мероприятие РФ Патшалăх Думин вĕренÿ енĕпе ĕçлекен комитечĕн председателĕн çумĕ Алена Аршинова, Чăваш Республикин Патшалăх Канашĕн председателĕ Юрий Попов тата ытти хаклă хăнасем те хутшăннă. «Газпром межрегионгаз Чебоксары» тулли мар яваплă обществăн тата «Чăвашсетьгаз» акционерсен уçă обществин генеральнăй директорĕ, ЧР Патшалăх Канашĕн депутачĕ Кияметдин Мифтахутдинов пĕлтернĕ тăрăх, центр çут çанталăк газне унпа усă куракансем патне çитерессипе çыхăннă пур ĕçе те пурнăçлать. «Газовиксем клиентсемпе ĕçлессине меллĕ тума тăрăшаççĕ. Çын пурăнакан вырăнсене газификацилеме, пурăнма тата ĕçлеме лайăх условисем тума эпир республика бюджетĕнчен чылай укçа-тенкĕ уйăратпăр», — çирĕплетнĕ Михаил Игнатьев. Вăл «Чăвашсетьгаз» акционерсен уçă обществин Канашри филиалĕн Тăвайри газ участокĕн начальникне Владимир Семенова Чăваш Республикин Строительство, архитектура, çурт-йĕр тата коммуналлă хуçалăх министерствин Хисеп грамотипе наградăланă.

Вырăс Нăрваш сали çывăхĕнчи хирте «Уй-хир кунĕ — 2013» ял хуçалăх техникин республикăри кăтарту-выставки уçăлнă. Кăçал аграри форумне агропромышленноç комплексĕн пысăк тата вăтам организацийĕсен, хресчен (фермер) тата килти хушма хуçалăхсен ертÿçисемпе специалисчĕсем, ял хуçалăх техникине, акмалли-лартмалли материалсене, ÿсен-тăрансене хÿтĕлекен им-çамсене тата минераллă удобренисене кÿрсе килекенсем хутшăннă. Пурĕ 100-е яхăн инновациллĕ ял хуçалăх техникипе паллашма май пулнă. Михаил Игнатьев пĕлтернĕ тăрăх, Раççей Президенчĕ Владимир Путин ял хуçалăх таварĕсене туса кăларакансене пулăшу кÿме хушма укçа-тенкĕ уйăрма йышăннă.

Хăнасем энергие тата ресурссене перекетлекен технологисемпе, ял хуçалăх техникин çĕнетнĕ тĕслĕхĕсемпе те паллашнă.

Вырăс Нăрваш салинче вара çак кун модульлĕ фельдшерпа акушер пунктне уçнă. «Патшалăх программипе килĕшÿллĕн, виçĕ çул хушшинче Чăваш Енри тĕрлĕ ялсенче пысăк пахалăхлă медицина пулăшăвĕ паракан 100 фельдшерпа акушер пункчĕ уçăлмалла. Çын пурăнакан кашни вырăншăнах ФАПсен пĕлтерĕшĕ пысăк, мĕншĕн тесен вĕсем вырăнтах пулăшу илме май параççĕ», — тенĕ Михаил Игнатьев Правительство ял тăрăхĕсене аталантарасси çине уйрăм тимлĕх уйăрнине палăртса. Кăçал республикăра 20 модульлĕ фельдшерпа акушер пункчĕ уçма палăртнă. Вĕсенчен 7-шĕ çывăх вăхăтрах хута каймалла ĕнтĕ.

ФАПăн фельдшерĕ Надежда Филиппова ял çыннисен ячĕпе Михаил Васильевича тав тунă.

Уява хутшăнакансем Тăвай салин тĕп сцени çинче иртнĕ «Йăлтăркка чечекĕм» ача-пăча карнавалне курса киленме, декораци-прикладной пултарулăх ăстисем туса хатĕрленĕ япаласен куравне тăратнă ĕçсемпе паллашма пултарнă. Районти ял тăрăхĕсем хутшăннă хăна кил картишĕсен «Ку ман ялăм, ку ман килĕм» конкурсĕнчи ĕçсем район çыннисене тата хăнасене чăннипех те тыткăнланă.

Республика кунне халалланă уява каçхине «Çеçпĕл» ВИА тата «Nota G» ташă компанийĕ хутшăннипе иртекен концерт малалла тăснă. Куракансем сцена çинчи артистсене тăвăллăн алă çупса кĕтсе илнĕ, кашни номерех хапăлласа йышăннă.

Уяв мероприятийĕсене «Кăпăк каçĕ» фейерверк тата «Радиосигналсем» ушкăн хутшăнакан çамрăксен дискотеки вĕçленĕ.