ăçалхи çулла Шупашкарти тепĕр 63 тăлăх ача çĕнĕ çĕре куçĕ. «Финская долина» микрорайонти 50 хваттере, Алькеш микрорайонĕнчи 13 хваттере туса пĕтернĕ. Вĕсем халĕ муниципалитет харпăрлăхĕнче шутланаççĕ. Йĕпреç районĕнчи 18 тата Шупашкар районĕнчи тăлăх 1 ача валли те çывăх вăхăтра хваттерсем хатĕр пулĕç. Пурĕ çак программа тăрăх кăçал тата 262 тăлăх ачана пурăнмалли вырăнпа тивĕçтермелле. Çакна валли 229,7 млн тенкĕ уйăрнă.

Çапах та кашни тăлăх ачана хваттерлĕ пулассипе ăннă тесе калама çук. Сăлтавĕ — строительство пуçарма бюджетран укçа илекенсем хăйсен тивĕçĕсене пурнăçлама васкаманнинче. Тĕслĕхрен, «МинСтрой» ООО (директорĕ А.Н.Яковлев) пĕлтĕр Пăрачкав, Элĕк, Хĕрлĕ Чутай районĕсенче строительство ĕçĕсене пурнăçламан. Красноармейски районĕнче вара вăл нумай ачаллă çемье валли хăпартма пуçланă çурта туса пĕтермен. Çак çуртри строительство ĕçĕсене вĕçлес тĕллевпе ял тăрăхĕн администрацийĕ аукцион ирттерме хатĕрленет.

Йĕпреç районĕнче 2011 çулта «Стройкомплект» ОООпа (директорĕ А.Р.Алимов) пысăк çуртри 18 хваттере тăлăх ачасене валли туянасси çинчен муниципаллă контракт çырнă. Ытти хваттерсене сутасси йывăрлăхсемпе çыхăннине пула строительство организацийĕн укçи-тенки ĕçсене пурнăçлама çитсе пыман. Çавна май çурта халĕ çеç туса пĕтернĕ. Шупашкар районĕнче «Стройгранд-Групп» ООО (директорĕ И.А.Ширхалов) ĕçлет. Хальлĕхе вăл çурта шал енчен туса пĕтермен, газ кĕртмен.

Пĕлтĕр тăлăх ачасене пурăнмалли вырăнпа тивĕçтерме 201,7 млн тенкĕ янă. Çав шутран 159 млн тенки — республика бюджетĕнчен, 42,7 млн тенки — федераллă бюджетран. Унсăр пуçне пĕлтĕр 2011 çултан юлнă 74,5 млн тенкĕ бюджет укçи-тенкипе те усă курнă. «Патшалăх тăлăх ачасен умĕнчи тивĕçĕсене пурнăçлать, программăна ĕçе кĕртме вăхăтра укçа-тенкĕ уйăрать. Яваплăха туйман застройщиксене пула вара хваттерсене чылай вăхăт кĕтме тивет», — пĕлтерет ЧР строительство, архитектура, пурăнмалли çурт-йĕр тата коммуналлă хуçалăх министрĕ Олег Марков. 2012 çулта тăлăх ачасене валли çуртсем тума е туянма аукционсене темиçе хутчен те ирттернĕ. Çавна май 242 тăлăх вырăнне 197-ĕн çеç çĕнĕ çĕре куçма пултарнă.

Хальхи вăхăтра Патăрьел, Йĕпреç, Куславкка, Комсомольски, Пăрачкав, Шупашкар рай-онĕсенче тата Çĕмĕрле хулинче 2012 çулта хăпартма пуçланă çуртсене туса пĕтереççĕ. Йĕпреç, Красноармейски, Хĕрлĕ Чутай тата Вăрмар районĕсенче вара конкурссене кăçал çĕнĕрен ирттереççĕ.