Йăлана кĕнĕ тăрăх, утă уйăхĕн пĕрремĕш шăмат кунĕнче Пĕтĕм тĕнчери кооперативсен кунне паллă тăваççĕ. Ăна 1922 çулта Пĕтĕм тĕнчери кооперативсен альянсĕн Тĕп комитечĕ çирĕплетнĕ. 800 миллион çынна пĕрлештерекен нумай отрасльлĕ тытăмра Раççей Федерацийĕнчи потребительсен кооперацийĕ тивĕçлĕ вырăн йышăнать. Комсомольски райповĕ те ăнăçлă ĕçлесе пыраканнисен йышĕнче. Çакна цифрăсемпе ÿсĕмсем çирĕплетеççĕ. Шăпах маттуррисем, ĕçченнисем иртнĕ эрне кун Пĕтĕм тĕнчери кооперативсен кунне халалланă уявра парнесемпе наградăсене тивĕçрĕç. Вăл çеç те мар, çав кун, июлĕн 5-мĕшĕнче, районта пурăнакансемшĕн чăннипех те пысăк уяв пулчĕ.

Чи малтанах спорта кăмăллакансем «Кĕтне» ФСКна йышлăн пухăнчĕç. Кунта спорт ветеранĕсемпе райпо тытăмĕн ĕçченĕсем тĕрлĕ дистанцисене чупса, граната ывăтса, тăршшĕне сиксе ăмăртрĕç. Чи маттуррисене парнесемпе тата Хисеп хучĕсемпе чысларĕç. Çак кунах Шурут, Нĕркеç ялĕсенче «Органика-Акконд» магазинсем уçăлчĕç. Çакă ялсенче пурăнакансемшĕн çав тери меллĕ, кунта печени-канфет ассортименчĕ пуян. «Туянакансен кăмăлне туллин ти-вĕçтерес тесе тăрăшатпăр», — терĕ райпо канашĕн председателĕ Евгений Карпеев магазинсене уçнă май.

Уявăн тĕп программине район центрĕн кану паркĕнче йĕркелерĕç. Суту-илÿ ĕçченĕсене, ветерансемпе пайщиксене, тавар туянакансене район администрацийĕн пуçлăхĕ Михаил Афанасьев, райпо совечĕн ертÿçи Евгений Карпеев тата ытти нумай сумлă хăна, партнерсем хĕрÿллĕн саламларĕç, малашне те тăрăшуллă ĕçлесе малтисен ретĕнче пыма сунчĕç. Нумай ĕçчене РФ Центросоюзĕн, Чăвашпотребсоюзăн тата райпо совечĕн наградисене парса саламларĕç. Сăмахран, Анат Тимĕрчкассинче пурăнакан райпона тĕрлĕ пахча çимĕç, сĕт нумай сутнăшăн тав турĕç. Чылай çул пĕрле килĕштерсе ĕçлекен партнерсене те Хисеп хучĕсемпе чысларĕç.

Уяв программи пĕлтĕрхинчен анлăрах, интереслĕрех пулчĕ тесе калас килет. Ачасем дискотекăра савăнчĕç. Хитре ташлакансем парнесене тивĕçрĕç. Тавар туянакансем хушшинчи лотерейăра телейлисем пылесослă, сехетлĕ, çĕвĕ машиниллĕ, грильлĕ, мультиваркăллă пулчĕç. Тĕп парнене — холодильнике — Валентина Михайлова тивĕçрĕ. Вăл шăпах çак кун «Торговый дом» суту-илÿ магазинĕнчен ылтăн вăчăра туяннă.

Уяв концертĕнче Шупашкар хулинчен килнĕ артистсем Григорий Вакку, Антонинăпа Петр Красновсем, Елена Османова, Рена Грачева, Николай Михайлов савăк юрă-кĕвĕ парнелерĕç. Куракансем вĕсене тăвăллăн алă çупрĕç.

Шашлăк, техĕмлĕ ытти тутлă апат-çимĕçпе сăйлакансем те чылайăн пулчĕç. Унпа пĕрлех «Ядринмолоко», «Ядринский мясокомбинат» ОООсем, «Кооператор» производство комбиначĕ хăйсем хатĕрлекен апат-çимĕçпе, мороженăйпа, канфет-печенипе, тутлă шывпа тÿлевсĕр хăналарĕç.

Район центрĕнче пурăнакансем çеç мар, ялсенчен те йышлăн килнĕ уява. Вĕсем тĕрлĕ продукци туянчĕç, концертра савăнчĕç, фейерверк курса киленчĕç.

А.АНТОНОВА.