Раççейре физкультурниксен кунне августăн иккĕмĕш шăмат кунĕнче паллă тăвасси йăлана кĕнĕ. Пирĕн районта та хисеплеççĕ çак уява, çавăнпах августăн 10-мĕшĕнче «Кĕтне» ФСК стадионне спорта юратакансем йышлăн пуçтарăнчĕç.

«Физкультурниксен кунĕ пурне те пĕрлештерет — сывă пурнăç йĕркине кăмăллакан, сывлăхлă пулассишĕн тăрăшакан ваттине те, вĕттине те. Уяв ячĕпе тренерсемпе спортсменсене, физкультура учителĕсемпе вĕсен вĕренекенĕсене ăнăçу, çирĕп сывлăх сунатăп», — саламларĕ пуçтарăннисене район администрацийĕн пуçлăхĕ Михаил Афанасьев. Унăн сăмахĕсем çумне «Кĕтне» спорткомплекс директорĕ Евгений Тихонов, вĕренÿ пайĕн начальникĕ Николай Максимов хушăнса районта пурăнакансене сывлăха куллен çирĕплетме чĕнсе каларĕç, спортсменсене ăмăртусенче çитĕнÿсем тума сунчĕç.

Спорт уявне килнисем çав кун тĕрлĕ дистанцисене чупса, персе, волейбол, футбол выляса тата ытти вăйăсенче вăй виçрĕç. Ăмăртусене ял поселенийĕсен пуçлăхĕсем, ял хуçалăх кооперативĕсен ертÿçисем, район администрацийĕн, налук инспекцийĕн, суд приставĕсен районти уйрăмĕсен ĕçченĕсем те хутшăнма кăмăл турĕç. Пирваях VIP-чупу пулчĕ. Дистанцие чи малтан парăнтарса финиша ар çынсенчен «Дружба» ЯХПК председателĕ Ремис Мансуров, хĕрарăмсенчен район администрацийĕн централизациленĕ бухгалтерийĕн руководителĕ Олеся Митюкова пĕрремĕш çитрĕç. Иккĕмĕш вырăнта — район администрацийĕн пуçлăхĕ Михаил Афанасьев тата Тукай ял поселенийĕн пуçлăхĕ Ольга Андреева, виççĕмĕшĕнче — районсем хушшинчи 2-мĕш номерлĕ налук инспекцийĕн начальникĕн çумĕпе Геннадий Филипповпа Александровка ял поселенийĕн ертÿçи Любовь Полякова.

Тĕл перес енĕпе хĕрарăмсем хушшинче экономика, пурлăх тата çĕр хутшăнăвĕсен пайĕн начальникĕ Светлана Ульдина, çак пайăн специалист-эксперчĕ Татьяна Яковлева тата Александровка ял поселенийĕн ертÿçи Любовь Полякова чи пултаруллисем пулчĕç. Ар çынсенчен вара ял хуçалăх предприятийĕсен ертÿçисем уйрăмах палăрчĕç. Николай Иванов (Ивановăн хресченпе фермер хуçалăхĕ) — пĕрремĕш, Николай Михайловпа Ремис Шарафутдинов («Турхан», «Труд» ЯХПКсем) пĕр пек очко пухса иккĕмĕш вырăна тухрĕç. Райадминистрацин ял хуçалăх тата экологи пайĕн начальникĕн Илдус Миннетуллинăн кăтартăвĕ — виççĕмĕш.

«Кĕтне» физкультурăпа спорт комплексĕн ĕçченĕсем çавăн пекех шашка, мини-футбол, волейбол вăййисем йĕркелерĕç. Футбол площадкинче каçченех вăйă шавĕ лăпланмарĕ. Çĕнтерÿçĕ ятне вара Комсомольски 2-мĕш вăтам шкулĕн выпускникĕсем тивĕçрĕç. Хирти Сĕнтĕр ял поселенийĕн команди — иккĕмĕш, виççĕмĕш вырăнта — Кĕçĕн Каçал ялĕн футболисчĕсем.

Çав шăмат кун Сывлăх кунĕ пулнă май, «Кĕтне» спорткомплексра пĕтĕм зала районта пурăнакансем тÿлевсĕрех кĕчĕç. Уйрăмах бассейнра шыва кĕрекенсем йышлă пулчĕç.

Физкультурниксен кунĕ çулталăкра пĕрре çеç килет, пирĕн вара хамăр сывлăхшăн тăрăшса кашни кунах хусканусем тăвасчĕ, спортпа, физкультурăпа яланах туслă пуласчĕ.

Л.ШУРЯШКИНА.