Ял хуçалăх кооперативĕсенче уй-хир ĕçĕсем малаллах пыраççĕ. Хуçалăхсенче çĕртме тăваççĕ, кĕр тыррисене акса хăварма çĕр хатĕрлеççĕ.

Авăнăн 3-мĕшĕ тĕлне фермер хуçалăхĕсемпе ял хуçалăх кооперативĕсенче пурĕ 6654 гектар çинче çĕртме тунă, кĕр тыррисене 3241 гектар çинче акнă. Çĕре сухалас енĕпе уйрăмах «Урожай» (905 гектар) колхоз, «Слава картофелю» агрофирма (582 гектар), «Дружба» ЯХПК (500 гектар), «Сюрбеево» ООО (300 гектар) маттур. Кĕр тыррисене акса хăварассипе «Востокра», «Дубравăра», «Слава картофелю» агрофирмăра, Минатуллин фермер хуçалăхĕнче тăрăшуллă ĕçлеççĕ.

Çĕр улми кăлармалли хĕрÿ вăхăт пулин те, пур хуçалăх та уя тухман-ха. «Комсомольские овощи» ООО-ра, «Слава картофелю» агрофирмăра, «Дружба» ЯХПКра, Минатуллин фермер хуçалăхĕнче çеç çĕр улми уйĕсенче ĕç вĕрет. Пурĕ районĕпе 179 гектар çинчи «иккĕмĕш çăкăра» кăларнă.

Ш.ЗЕЙНУТДИНОВ.