Ваттисен кунне халалласа çакăн пек ятпа республикăра уйăхлăх пуçланнă. Раççейри пенсионерсен канашĕ пуçарнă акцие тивĕçлĕ канăва тухнисене тимлĕх уйăрас тĕллевпе йĕркеленĕ.

Уйăхлăх вăхăтĕнче пĕччен пурăнакан кинемей-мучисене хуçалăхри ĕçсене тума пулăшĕç, Ветерансен çурчĕсенче тата культура керменĕсенче концертсем, тĕл пулусем иртĕç. Вĕсен сывлăхне çирĕплетессипе Шупашкарта «Сывлăх сукмакĕ» акци йĕркелĕç. Юпа уйăхĕн 1-мĕшĕнче «Салют» кермене уяв программине йыхравлĕç.

Тепĕр пулăм — аслă ÿсĕмрисен спартакиади. Ăмăртусем кашни район-хулара иртĕç, финал Çĕнĕ Шупашкарта пулĕ. Чăваш патшалăх университетĕнче пенсионерсем валли компьютер курсĕ уçăлĕ. Каласа хăвармалла: ваттисен йышĕнче çĕнĕ техникăпа усă курма пĕлекен сахал мар. Çакна республикăра иртнĕ олимпиада та çирĕплетет. Унта çĕнтернисем çĕр-шыв чемпионатне те хутшăнчĕç.